Bala quqyqtaryn qorǵaý komıteti blogerlerge úndeý jasady

ASTANA. KAZINFORM – QR Oqý-aǵartý mınıstrligi Balalardyń quqyqtaryn qorǵaý komıteti barlyq blogerlerdi, ınflıýenserlerdi jáne medıa salasynyń qatysýshylaryn balalardyń quqyqtaryn saqtaýǵa jáne qoldanystaǵy zańnamany qatań ustanýǵa shaqyrdy.

− Áleýmettik jelide balasynyń quqyqtary buzylǵanyn málimdegen ananyń vıdeoúndeýi tarady. Bul — tanymal blogerlerdiń biri jarııalaǵan, kámeletke tolmaǵan balany túsirgen beınematerıal. Komıtet tóraǵasy Nasymjan Ospanova balanyń anasymen tikeleı baılanysqa shyǵyp, jan-jaqty kómek usyndy — psıhologııalyq jáne zańgerlik kómek qarastyryldy. Qajet bolǵan jaǵdaıda Komıtet balanyń quqyqtary men múddelerin qorǵaý úshin resmı túrde sot protsesine qatysýǵa daıyn, − dep jazylǵan komıtet habarlamasynda.

Komıtet barlyq blogerlerdi, ınflıýenserlerdi jáne medıa salasynyń qatysýshylaryn balalardyń quqyqtaryn saqtaýǵa jáne qoldanystaǵy zańnamany qatań ustanýǵa shaqyrady. Jaqsy nıetpen túsirilse de, balalar qatysqan kontentti jarııalaý olardyń psıhologııalyq jaı-kúıine teris áser etip, quqyqtyq jaýapkershilikke ákelýi múmkin.

− Qazaqstan Respýblıkasynyń Azamattyq kodeksiniń 145-babyna sáıkes, kez kelgen adamnyń, sonyń ishinde balanyń beınesin jarııalaý tek onyń nemese zańdy ókiliniń kelisimimen ǵana júrgiziledi. Sondaı-aq, «Derbes derekter jáne olardy qorǵaý týraly» zańǵa sáıkes, balanyń beınesi qoljetimdiligi shekteýli jeke derek bop sanalady jáne zańmen qorǵalady. Qurmet, qorǵaý jáne qaýipsizdik – árbir balanyń quqyǵy. Bul quqyqtar shynaıy ómirde de, tsıfrlyq keńistikte de qamtamasyz etilýi kerek, − deıdi komıtet.

Buǵan deıin Bala quqyqtary jónindegi ýákil Dınara Zákıeva tanymal bloger vıdeosynan keıin býllıngke ushyraǵan bala týraly pikirin bildirdi jáne blogerdi qatań synǵa alǵan edi.

Sondaı-aq balalar ombýdsmeni «Darıkorn daýyna» qatysty pikir bildirdi.