Bala quqyǵyn qorǵaıtyn sharalardyń bári bir qujatqa biriktirildi – Memlekettik keńesshi

QYZYLORDA. KAZINFORM – Qyzylordada ótip jatqan V Ulttyq quryltaıda  Memlekettik keńesshi Erlan Qarın bala quqyǵyn qorǵaýdaǵy sharalar bir arnaǵa toǵystyrylyp jatqanyn aıtty.

- Ǵylym jáne bilim, bala quqyqtaryn qorǵaý salasynda mańyzdy bastamalar qolǵa alyndy. Jaqynda ǵylymı qalashyqtar qurý jáne damytý tujyrymdamasy qabyldandy. Mektepterdegi tárbıe baǵdarlamasy jetildirildi. Memleket basshysynyń tapsyrmasymen «Qazaqstan balalary» birtutas baǵdarlamasy ázirlendi. Balalardyń quqyǵyn qorǵaý baǵytyndaǵy sharalarynyń bári endi osy qujatqa biriktirildi, - dedi Erlan Qarın.

Sondaı-aq ol, jýyrda Úkimet qaýlysymen nashaqorlyqqa jáne esirtki bıznesine qarsy kúres jónindegi jańa keshendi jospar qabyldanǵanyn atap ótti.

- Ótken jyldyń qarasha aıynda Prezıdenttiń Jarlyǵymen ishki saıasattyń negizgi qaǵıdattary, qundylyqtary men baǵyttary bekitildi. Bul qujat – táýelsiz Qazaqstan tarıhyndaǵy ishki saıasat salasyn júıeleıtin alǵashqy tujyrymdamalyq qujat. Ony ázirleýge quryltaı músheleri, sarapshylar erekshe atsalysty, - dedi Memlekettik keńesshi.

Aıta keteıik, Kazinform Memleket basshysynyń Ulttyq quryltaıdaǵy sózin translıatsııalaıdy.