Bala kópqabatty úı terezesinen qulap ketpes úshin qandaı qaýipsizdik sharalaryn saqtaý kerek

ÓSKEMEN. KAZINFORM – Shyǵys Qazaqstan oblysynyń qutqarýshylary bala kópqabatty úıdiń terezesinen qulap ketpes úshin qandaı qaýipsizdik sharalaryn saqtaý kerektigin túsindirdi.

ShQO tótenshe jaǵdaılar departamenti baspasóz qyzmetiniń málimetine súıensek, qutqarýshylar kópqabatty úılerdiń terezesine qorǵanys quraldaryn ornatý aktsııasyn ótkizýde. Bul joly múgedek balalar turatyn otbasynyń tezelerine arnaıy qulyptar ornatyldy. 

«Jazataıym oqıǵalar ata-analar páterlerde terezeler ashyq ekenin umytyp, balalardy birneshe mınýtqa qaraýsyz qaldyrǵan kezde bolady. Sondyqtan qorǵanys quraldaryn ornatý óte mańyzdy. Departament qyzmetkerleri turaqty negizde ata-analar arasynda aqparattyq-túsindirý jumystaryn júrgizip keledi», — dedi oblystyq TJD bastyǵynyń orynbasary Qýatbek Kenjebekuly.

Aktsııaǵa kásipkerler qatysýda. Terezelerge qorǵanys qurylǵylardy «Za Oknami_Oskemen» kompanııasy satyp alýǵa kómektesken. 

Osy rette, TJD óńir jurtshylyǵyna kelesi eskertýlerdi qaperde ustaýdy suraıdy:

— Úıde kishkentaı bala bolsa, terezelerdi ashyq qaldyrmańyz.
— Terezelerdiń janyna jıhaz qoımańyz.
— Terezelerde arnaıy qorǵanys qurylǵylary bolýy kerek.
— Bala ony ózdiginen asha almaıtyndaı etip tereze tutqasyn qulyptańyz.
— Balany tereze aldyna shyǵýǵa jáne terezeden kóshede ne bolyp jatqanyn kórýge úıretpeńiz, ol siz joqta ony qaıtalaýy múmkin.
— Balalarǵa eresekterdiń qaraýynsyz balkonǵa shyǵýǵa ruqsat etpeńiz.
— Esińizde bolsyn, moskıt tory balany qulaýdan qutqarmaıdy.
— Balalardyń qaýipsizdigi tek sizdiń qolyńyzda!
— Tótenshe jaǵdaı bolǵan kezde «112», «101» telefondary boıynsha qońyraý shalyńyz.