Bala kókjótelmen aýyrmaý úshin der kezinde ekpe alý mańyzdy – maman
ORAL. KAZINFORM – Batys Qazaqstan oblysynda jyl basynan beri 7 adamnyń kókjótelmen aýyrǵany anyqtaldy.
BQO sanıtarııalyq-epıdemıologııalyq baqylaý departamenti basshysynyń orynbasary Nurlybek Mustaevtyń málim etkenindeı, zerthanalyq turǵyda rastalǵan naýqastardyń barlyǵy – 14 jasqa deıingi balalar.
Nurlybek Ermekulynyń sózine qaraǵanda, aýrýdyń basym kópshiligi uıymdastyrylmaǵan balalar arasynda jáne Oral qalasynda tirkelip otyr. Olardyń bári de ekpe almaǵan. Ekeýiniń sebebi – ata-anasy vaktsınatsııadan bas tartqan, beseýi ekpe jasyna jetpegen.
- Kókjótelmen aýyrǵanda, ınkýbatsııalyq kezeń 6 kúnnen 20 kúnge, alǵashqy nemese kataraldy kezeń 14 kúnge deıin barady. Ustamaly jóteldiń paroksızmaldy jáne ınspıratorly entigý ýaqyty 1 aı jáne odan da kóp merzimge sozylady. Kókjótelmen syrqattanǵandar qatty qınalady. Tipti tynysy toqtap qalýy yqtımal. Sondaı-aq pnevmonııaǵa ulasýy múmkin. Sondyqtan kókjóteldiń aldyn alý mańyzdy, - dedi N.Mustaev.
Onyń aıtýynsha, búgingi tańda kókjóteldiń aldyn alýdyń jalǵyz jáne tıimdi sharasy mindetti vaktsınatsııa kúntizbesine engizilgen ımmýndaý bolyp esepteledi.
- Vaktsınatsııa aýrýdyń belgileri joq (sýyq tııý, dene qyzýynyń kóterilýi), deni saý balalarǵa ǵana jasalady. Vaktsınatsııa josparly túrde Ulttyq egý kúntizbesine sáıkes sábı 2 aıǵa tolǵanda, 3, 4 jáne 18 aıda júrgiziledi. Sondyqtan ata-analardyń balalaryn der kezinde ektirýiniń mańyzy zor, - dedi maman.
Eske sala keteıik, budan buryn Batys Qazaqstanda kókjótelmen aýyrǵan 18 balanyń deni ekpe almaǵanyn jazǵan edik.
