Bala kezimnen súıek pen múıiz jınaımyn — qyzylordalyq qolónershi
QYZYLORDA. KAZINFORM – Qyzylorda oblysy Shıeli aýdanynyń turǵyny Medeý Berdimurat atadan qalǵan asyl mura — qolónerdi zaman talabyna saı jańǵyrtyp júr.
Múıiz ben súıekten kádesyı jasaýdyń qyr-syryn ózi muǵalim bolyp eńbek etetin Ǵ.Muhamedjanov atyndaǵy №270 orta mekteptiń oqýshylaryna úıretýden jalyqqan emes.
Keıipkerimiz aýdan ortalyǵynda ornalasqan M.V.Lomonosov atyndaǵy qazaq orta mektebin bitirgen. Qorqyt ata atyndaǵy Qyzylorda memlekettik ýnıversıtetiniń eńbek pániniń muǵalimi mamandyǵy boıynsha túlegi. Bala kúninde bul ónerge qyzyǵýshylyǵyn oıatqan naǵashy atasy Imantaı Aldabergenuly men naǵashy ájesi Shynar Nábıqyzy eken.
- Ata-ájemniń úıine qydyryp barǵanda súıekpen kómkerilgen kebejeni kóretinmin. Maǵan súıekten neshe túrli buıymdar jasaýǵa bolatyny týraly oı keldi. Bul oń-solymdy bilip qalǵan kez edi. Sóıtip, súıek pen múıizdi jınap júretin ádet paıda boldy. Súıekten ártúrli dúnıe jasaǵanymmen satýǵa ebim joq. Bul jumys — kóńilimniń qalaýy, - dedi qolóner sheberi.
Súıekti daıyn ónimge aınaldyrǵanǵa deıin onyń babyn jasaý ońaı sharýa emes. Ózindik tehnologııasyn saqtamasa, tókken ter tekke ketti deı berińiz.
- Múıizdi, súıekti áýeli qazandaǵy sýǵa qaınatyp alamyn. Sosyn ony maı men qannan tazartamyn. Súıekti maıynan ajyratý úshin tuzdy sýda 7-8 saǵat qaınatý kerek. Osy shıkizattardan jasalatyn buıymdy kózben elestetip, kerek emes jerin jonyp alý arqyly daıyndaımyn. Súıekti joný kezinde shyǵatyn kúl men tozań densaýlyq úshin qaýipti. Bir jaǵynan aşy ıisi bar, qolqany qabady. Sol sebepti jumys barysynda qorǵanysh quralyn taqqan durys, - dedi ol.
Sheber qoı, sıyr men túıenikine qaraǵanda jylqynyń súıeginen maıdy ajyratý qıyn ekenin atap ótti. Súıekti jelimmen jabystyrý múmkin emes. Keıipkerimiz ony bir-birine burandama arqyly biriktirip, bekitetin ádiske kóshken.
Medeý Berdimurat tózimdilikti talap etetin qaýipti ári kúrdeli ónerge tehnologııa páninde yntaly oqýshylardy baýlyp júr. Olardyń aldy ártúrli bilim báıgesinde top jaryp úlgerdi. Sheber shákirtteri arasynda umytylyp bara jatqan ulttyq ónerdi ózi sııaqty uǵynyp, ushpaqqa shyǵaratyn balalardyń baryna senimdi.
Buǵan deıin biz kıiz basý ónerin jańǵyrtyp, ony kópshilikke úıretip júrgen atyraýlyq jas sheber Nargız Aımaǵambetova týraly jazǵanbyz.
