Bala kezinde kóship kelgen: 39 jastaǵy qandasymyz el azamattyǵyn aldy

ATYRAÝ. QazAqparat – Atyraýda Reseıden kóship kelgen qandastyń áleýmettik máselesi sheshimin tapty, dep habarlaıdy QazAqparat.

Reseı Federatsııasynyń Astrahan oblysynda ómirge kelgen Janna Ilbalıevanyń múgedektigi bar. Qazir jasy – 39-da. Atyraýǵa bala kezinde kóship kelgen. Biraq, jeke basyn kýálandyratyn qujaty bolmaǵandyqtan, Qazaqstan Respýblıkasynyń azamattyǵyn almaǵan.

«Sol sebepten, ol ómirlik qıyn jaǵdaıda qalǵan adamdardy qaıta áleýmettendirýge arnalǵan ortalyqta turǵan. Buǵan deıin oǵan áleýmettik kómek taǵaıyndalmaǵan. Atyraý qalalyq ákimdiginiń tikeleı aralasýymen bul másele sheshimin tapty. Jannanyń jeke basyn káýalandyratyn jáne múgedektigi boıynsha qujattaryn daıyndap berdik. Endi ol áleýmettik járdemaqy alatyn boldy. Oǵan ІІ top múgedektigi taǵaıyndaldy.

Eń bastysy, Qazaqstan Respýblıkasynyń azamattyǵy berildi. Ákimdik tarapynan arnaıy áleýmettik qyzmetker bólindi. Páteriniń kommýnaldyq qyzmetterge bereshegi tolyǵymen ótelip, turmysqa qajetti zattarmen, kıim-keshekpen tolyq qamtyldy», - deıdi Atyraý qalalyq jumyspen qamtý, áleýmettik baǵdarlamalar jáne azamattyq hal aktilerin tirkeý bóliminiń basshysy Nurly Habıeva.

Onyń aıtýynsha, páter qujattaryn Janna Iltbalıevanyń atyna rásimdeý júrgizilip jatyr.

Eske sala ketelik, buǵan deıin Atyraýda turǵylyqty mekenjaıy joq 50-ge jýyq adam arnaıy ortalyqqa jetkizilgenin jazǵan edik.