Bala kezimde etik jóndeýge qyzyǵatyn edim – atyraýlyq etikshi kelinshek

ATYRAÝ. QazAqparat – Atyraý oblysynda turatyn etikshiniń biri – Gúldana Haýasheva. Onyń yqylasy bala kezinen osy kásipke aýǵan. Qýyrshaqpen oınaýdan góri aýladaǵy garajda temir-tersekterdi shuqylap, aıaqkıim jóndeýdi unatqan. Sol kezde sińlisiniń sporttyq aıaqkıimin jóndep bergen. Arǵy atalarynyń kásibin qaıta jańǵyrtqan ol etik jóndeýdi qalaı bastaǵanyn aıtyp berdi, dep habarlaıdy QazAqparat tilshisi.

Kindik qany Mańǵystaý óńirinde tamǵan. Balalyq shaǵyn Aqtóbe oblysynyń Reseımen shekaradaǵy Mártók aýdanynda ótkizgen. 2002 jyly Atyraý oblysynyń jigitine turmysqa shyǵyp, sodan beri Maqat kentinde turady.

«Bala kezimde qurbylarym sekildi qýyrshaqty qushaqtap, sary shashyn taraýǵa yntam bola qoıǵan joq. Aýladaǵy garajda temir-tersekti aýdaryp-tóńkerý, aıaqkıimdi jóndeý sekildi ister unaıtyn. Sol kezde sińlimniń sporttyq aıaqkıimin jóndep beretin edim. Etikshilik – arǵy atalarymyzdan kele jatqan kásip», -deıdi Gúldana Haýasheva.

Ol etikshilik kásipti 2006 jyly bastaǵan. Tapsyrys berýshilerdiń aıaqkıimin óz úıinde jóndegen. Alǵashqyda onyń bul isine tańdanys bildirgender az bolmapty. Biraq, keıin kúdikpen qaraǵandar aıaqkıimin jıi jóndetken.

Al, 2010 jyly jeke kásibin ashý úshin Maqat kentindegi bazar aýmaǵynan dúńgirshekti jaldaǵan. Qytaı óndirisinen shyqqan «Versal» markaly tigin máshınkesi bar.

«Qaı isti de yntamen atqarǵanda ǵana jemisti bolaryna kózim jetti. Keıde sharshaıtyn, densaýlyqqa kóńil bóletin sát kezdesedi. Sondaıda kúıeýim de, balalarym da kómektesedi. Tipti qaıynaǵalarymnyń balalary etikshilikti menen úırenýge nıet bildirdi. Tapsyrys berýshilerdiń tizimi jazylǵan 10-ǵa jýyq qalyń dápterim bar. Etigin jóndetken jandardyń eshqaısysy renishin bildirgen joq. Óıtkeni klıentterimniń etigin sapaly jóndeýge mán beremin», -dep áńgimeledi etikshi.

Qazir Gúldana Haýashevanyń shaǵyn sheberhanasyn ashqan. Oǵan tapsyrys berýshilerdiń biri kirip, ekinshisi shyǵyp jatady. Óıtkeni etikshi kelinshek aıaqkıimdi jóndeýmen shektelmeı, tutynýshynyń qalaǵan túsine boıaýdy qolǵa alǵan. Túrli kilttiń kóshirmesin aınytpaı jasap beredi.

«Etikshi bolý ońaı emes. Kúnine 30-ǵa jýyq tapsyrys túsedi. Tapsyrys berýshilerdiń talǵamy ártúrli ǵoı. Bári de jóndeýge tapsyrǵan etiginiń jańadan kem bolmaǵanyn, biri taǵasyn, endi biri syrmasyn jańartyp berýdi qalaıdy. Keıbir etiktiń jyrtyǵyn jamap, ultanyn aýystyrý, boıaý sekildi jumystardy atqarýǵa tózimdilik qajet», -deıdi ol.

Onyń aıaqkıim tigýdi qolǵa almaq nıeti bar. Kúıeýine arnap kúzgi maýsymǵa arnalǵan báteńke tigip bergen. Báteńkeniń ólshemi – 43. Biraq aıaqkıimge qajetti bylǵary, ultan, tipti kapron jipti tapshylyǵy alańdatady. Munyń bárin ózge elden aldyrady.

«Elimizde bylǵary óńdeý óndirisi jandanbaı tur. Bylǵary ózimizde óńdelse, otandyq ónimdi qýana alar edik. Óıtkeni etikshilerge sapaly bylǵary óte qajet», -deıdi Gúldana Haýasheva.

Eske sala ketelik, buǵan deıin Atyraý oblysynda 35 myń bıznes nysandy qyz-kelinshekter basqaryp otyrǵanyn jazǵan edik.