Bala yrysy: Qyrǵyzstanda balalarǵa arnalǵan jańa járdemaqy engizildi
ASTANA. KAZINFORM — Halyqaralyq áıelder kúnine oraı, 8 naýryzda Qyrǵyzstan prezıdenti Sadyr Japarov 3 jasqa deıingi barlyq balaǵa arnalǵan jańa aı saıynǵy memlekettik járdemaqy — «Bala yrysy» baǵdarlamasyn engizý týraly Jarlyqqa qol qoıdy, dep habarlaıdy Kabar.
Prezıdent ákimshiliginiń baspasóz qyzmetiniń habarlaýynsha, tólemder bıyl 1 shildeden bastalyp, otbasynyń tabys deńgeıine qaramastan 3 jasqa deıingi árbir balaǵa taǵaıyndalatyn bolady. Járdemaqynyń mólsheri aıyna 1200 somdy quraıdy.
Memleket basshysy atap ótkendeı, bul sheshim azamattardan túsken kóptegen ótinishke jaýap retinde qabyldandy jáne balanyń damýy úshin eń mańyzdy kezeńde otbasylarǵa qoldaý kórsetýge baǵyttalǵan.
— Memleket basshysy retinde men memlekettik járdemaqylar júıesi boıynsha túsken shaǵymdardy kórip otyrmyn, onda tólem alý isi derlik sheshilmeıtin kedergilerge aınalady. Kóptegen ananyń naqty qajettilikteri nazardan tys qalady. Otbasylar memleketten kómek suraýǵa májbúr, biraq qoldaý ornyna olar bas tartýlar men sheksiz bıýrokratııalyq sheńberlerge tap bolady. Bul, ásirese nárestelerge qatysty bolǵanda, múlde qabyldanbaıdy. Ómirdiń alǵashqy jyldarynda adamnyń ómir boıyna saqtalatyn eń mańyzdy fızıkalyq jáne aqyl-oı qabiletteri qalyptasady. Sondyqtan men búgingi Jarlyq arqyly Úkimetke «Bala yrysy» jańa járdemaqysyn engizýdi tapsyramyn, — dedi Sadyr Japarov.
El basshysynyń sózinshe, ár bala óz nesibesimen dúnıege keledi.
— Árıne, keıbir adamdar járdemaqyny durys paıdalanbaý jaǵdaılary bolýy múmkin deıdi. Biraq meniń oıymsha, memleket keıbir artyq tólemder jasaǵanymen, naǵyz muqtaj bir bala kómeksiz qalmaıtyn bolsa, bul áldeqaıda durys, — dep atap ótti Qyrǵyzstan prezıdenti.
Sonymen qatar, Prezıdent jańa áleýmettik qoldaý sharasy balalar kedeıligin azaıtýǵa jáne balanyń damýy úshin eń mańyzdy kezeńde otbasylarǵa kepildendirilgen kómek kórsetýge baǵyttalǵanyn aıtty.
Ulttyq statıstıka komıtetiniń málimeti boıynsha, Qyrǵyzstanda 3 jasqa deıingi shamamen 445 myń bala turady.
Osydan buryn Qyrǵyzstannyń halyqaralyq rezervteri alǵash ret 10 mlrd dollardan asqanyn jazdyq.