Bala Fest: Astanada 200-ge jýyq bala sport pen shyǵarmashylyqtan synǵa tústi
ASTANA. KAZINFORM — Astanada 15 jasqa deıingi balalardyń basyn qosqan Bala Fest festıvali ótti.
«Astana» saıabaǵynda uıymdastyrylǵan sharada 200-ge jýyq jas qatysýshy sport, robototehnıka jáne shyǵarmashylyq baǵyttar boıynsha 11 túrli saıysta baq synap, qaýipsizdik pen jol qozǵalysy erejeleri týraly paıdaly aqparat aldy.
Jas qatysýshylar VEX robototehnıkasy, robo-sýmo jáne robofýtbol boıynsha sheberlik sabaqtary men saıystarda baq synady. Sondaı-aq asyq atý, erekshe asyq oınaý ádisi arqyly ınklıýzıvti balalarǵa beıimdelgen bochcha, láńgi tebý, jerde sýret salý jáne basqa da qyzyqty oıyndar qarastyrylǵan.
— Jaz mezgilinde balalarǵa arnalǵan KIDS RUN júgirý is-sharasyn 4 márte uıymdastyrdyq. Mektep jáne mektep jasyna deıingi balalardy tolyqtaı qamtydyq desek bolady. Endi oqý jyly bastalǵan sátte bilim men sportty baılanystyryp, alǵash ret 200 balanyń qatysýymen Bala Fest festıvalin ótkizip jatyrmyz. Ózderińiz biletindeı, jaqynda ǵana el Prezıdenti Qasym-Jomart Toqaev jasandy ıntellektini de bolashaqtyń basty baǵyty retinde atap ótken bolatyn. Osyndaı ıdeıa bizdiń sharamyzǵa belsendi qatysyp jatqan ata-analardyń bastamasy degim keledi. Endi aldaǵy ýaqytta da sharalardy jalǵastyratynymyzǵa senimdimiz, — dedi Sporttyq-buqaralyq is-sharalardy ótkizý dırektsııasy basshysynyń orynbasary Erjigit Óserbaı.
Budan bólek, «Zań men tártip» qaǵıdaty aıasynda polıtsııa ókilderi jol qozǵalysy erejelerin saqtaý, kóshedegi qaýipsizdik pen jaýapkershilik jóninde túsindirý júrgizdi.
— Búgingi festıvaldi áleýmettik jeliden oqyp, keldim. Maǵan unady. Balalar óte kóp. Merekelik atmosfera seziledi. Jeke ózim jaz boıy balalarǵa arnalǵan júgiristerge belsendi qatystym. Búgin jerde sýret salý baıqaýynda synǵa túsýge sheshim qabyldadym, — dedi 8-synyp oqýshysy Gúljan Turǵanbaı.
Aıta keteıik, festıvalge 15 jasqa deıingi balalar qatysty. Saıystar qorytyndysynda úzdikter anyqtalyp, dıplomdarmen jáne arnaıy syılyqtarmen marapattaldy.
