Bala Dımash qandaı boldy
ASTANA. QazAqparat - Aqtóbeniń perzenti Dımash Qudaıbergenniń ózi de, ol aıtqan án de qazir Qytaı elinde hıtke aınalyp úlgerdi.
Mıllıardtaǵan qytaılyqtardyń tańdaıyn qaqtyrǵan jerlesimizdiń Qytaı Halyq Respýblıkasynyń ortalyq «Hunan TV» telearnasy uıymdastyrǵan «I am singer» baıqaýynyń birinshi kezeńinde top jaryp, úzdik kóringenin buǵan deıin de habarlaǵan bolatynbyz. Úsh aıǵa sozylatyn baıqaý 14 kezeńnen turady. Aldyn ala irikteýden ótip, baıqaýdyń birinshi kezeńine 8 ánshi qatysypty. Onyń eń jasy - bizdiń Dımash.
Al endi ǵalamtordy shýlatqan Dımashtyń bala kezde qandaı bolǵandyǵy týraly anasy Svetlana Aıtbaevadan az-kem suraǵan edik, dep jazady aktobegazeti.kz.
- Dımashtyń esimi aıanmen qoıyldy. Onyń qysqasha tarıhy bylaı: atamyzdyń stýdenttik kezinen beri syılastyǵy úzilmegen Baqtyǵalı Sandybaev degen dosy boldy. Sonyń toqsannan asqan ájesi sol kezde tús kórgenin, túsinde dúnıege keletin balanyń esimin Muhammed qoıyńdar dep aıan berilgenin aıtty. Sodan ata-enem bar, joldasym Qanat bar, Paıǵambar esimine tilimiz tıip ketip júrer degen oımen, ári ájeniń de kóńilin qaldyrmaı, sál ózgertip, balanyń esimin «Dinmuhammed» dep qoıdy. Sodan beri Dinmuhammed degen aty qujatta ǵana jazylady, al úıde, qazir tipti sahnada da Dımash bop aıtylyp júr. Bulaı erkeletý kórnekti qaıratker Dinmuhammed Qonaevtan bastalǵan úrdis qoı. Biz de sodan aspadyq. Qazaqstandaǵy barlyq Dinmuhammedter - Dımashtar ǵoı. Ol - jazylmaǵan zań, - deıdi Dımashtyń anasy.
