Bala densaýlyǵyn saqtaý: elimizde jańa pılottyq joba iske qosylady
ASTANA.KAZINFORM - Densaýlyq saqtaý mınıstrligi árbir bala men onyń otbasyna «bir tereze» qaǵıdaty boıynsha erte kómek kórsetýdiń qoljetimdiligin qamtamasyz etý maqsatynda 32 aýdandyq aýrýhananyń bazasynda pılottyq jobany iske qosatynyn habarlady.
Atalǵan jobany júzege asyrý máselesi damýynda buzylystar qaýpi bar balalarǵa medıtsınalyq kómek kórsetý júıesin damytý jónindegi vedomstvoaralyq úılestirý keńesiniń alǵashqy otyrysynda talqylandy.
Otyrysty ashqan Densaýlyq saqtaý birinshi vıtse-mınıstri Tımýr Sultanǵazıev balalar densaýlyǵyn saqtaý memlekettiń strategııalyq basymdyǵy ekenin atap ótti. Qazaqstanda balalarǵa týǵannan bastap skrınıngtiń bes túri júrgiziledi, al jyl saıynǵy profılaktıkalyq tekserýlermen bes mıllıonnan astam bala qamtylady. 2025 jyldan bastap medıtsınalyq-sanıtarııalyq alǵashqy kómek uıymdarynyń bazasynda 386 Damý jáne erte aralasý ortalyǵy jumys isteıdi. Qabyldanyp jatqan sharalar patologııalardy erte anyqtaý jáne der kezinde kómek kórsetý baǵytynda oń nátıje kórsetip jatyr.
Sonymen qatar otyrysqa qatysýshylar qoldanystaǵy túzetý kómegi júıesi balalar men otbasylardyń erte aralasý qyzmetterine degen qajettiligin tolyq kólemde qamtamasyz ete almaı otyrǵanyn atap ótti. Bul kómek kórsetýdiń eń qolaıly kezeńi – balanyń 3–5 jasqa deıingi damýyndaǵy «altyn tereze» kezeńiniń jiberip alynýyna ákelýi múmkin.
Qoǵamdyq uıymdardyń ókilderi erte aralasý qyzmetteriniń qoljetimdiligin odan ári keńeıtý, ata-analardyń arasynda aqparattyq-túsindirý jumystaryn kúsheıtý jáne bala men otbasynyń múddesi úshin vedomstvoaralyq ózara is-qımyldy nyǵaıtý qajettigin atap ótti.
Otyrys qorytyndysy boıynsha Almaty, Shyǵys Qazaqstan, Mańǵystaý oblystary men Jetisý oblysynyń aýyldyq deńgeıdegi medıtsınalyq uıymdarynda erte aralasý jobasyn pılottyq rejımde iske qosý týraly sheshim qabyldandy.
Otyrys jumysyna Oqý-aǵartý mınıstrliginiń, Eńbek jáne halyqty áleýmettik qorǵaý mınıstrliginiń ókilderi, Almaty, Shyǵys Qazaqstan, Mańǵystaý oblystary jáne Jetisý oblysy ákimderiniń orynbasarlary, ıÝNISEF Qazaqstandaǵy ókilderi, Samruk-Kazyna Trust qory, Ulttyq balalardy ońaltý ortalyǵy, sondaı-aq qoǵamdyq uıymdar men sarapshylar qaýymdastyǵynyń ókilderi qatysty. Kún tártibindegi jeke másele retinde 2025–2027 jyldarǵa arnalǵan erte jastaǵy balalardy damytý jáne erte aralasý jónindegi «Sátti bastaý» is-sharalarynyń keshendi josparyn iske asyrý barysy qaraldy.
«Sátti bastaý» vedomstvoaralyq jospary salaaralyq úılestirýdi nyǵaıtý, kadrlyq áleýetti damytý, mektepke deıingi bilim berý júıesin jetildirý, qarjylandyrýdyń turaqty tetikterin engizý jáne otbasyn qoldaý jónindegi memlekettik saıasatty damytý sharalaryn kózdeıdi. Budan bólek, «Qazaqstan balalary» tujyrymdamasy sheńberinde egov.kz platformasy bazasynda 18 jasqa deıingi balalardy qoldaýǵa arnalǵan biryńǵaı vedomstvoaralyq tsıfrlyq platforma qurý josparlanyp otyr. Bul júıe balaǵa kómek kórsetý úderisiniń barlyq kezeńderinde úzdiksiz baǵyttaý men qoldaýǵa qamtamasyz etýge múmkindik beredi.
Atalǵan sharalardy iske asyrý balalar men otbasylardy qoldaýdyń tıimdi júıesin qalyptastyrýǵa, damý erekshelikteri bar balalardyń ómir súrý sapasyn jaqsartýǵa jáne Qazaqstandaǵy balalar múgedektiginiń deńgeıin odan ári tómendetýge baǵyttalǵan.
Aıta keteıik, Memlekettik keńesshi Erlan Qarın men Bala quqyqtary jónindegi ýákil Dınara Zákıeva otbasy, áıel jáne bala quqyqtaryn qorǵaý máseleleri boıynsha jumys isteıtin biryńǵaı «111» baılanys ortalyǵynyń qyzmetimen tanysty.
