«Bala daýysy» júldegeriniń anasy: Deni saý balalarmen qatar bolý úshin úsh ese kóp eńbektenýimiz kerek
Almatyda «Bala daýysy» ulttyq án baıqaýynyń tórtinshi maýsymy aıaqtaldy. Baıqaý Qazaqstannyń ońtústik astanasynda 25-27 qazan kúnderi Respýblıka saraıynyń sahnasynda ótti. Baıqaýǵa elimizdiń barlyq óńirinen 17 bala qatysty. Olar baıqaýǵa arnaıy jazylǵan balalarǵa arnalǵan avtorlyq ánderdi oryndady.
Baıqaý nátıjesi boıynsha aqtaýlyq jas ánshi Dınara Qarjaýbaı jeńimpaz atansa, ekinshi oryndy atyraýlyq juldyz Alfııa Tilekqabyl jeńip aldy. Jaqynda 13 jasqa tolǵan Alfııa «Aqqý armany» atty jańa avtorlyq ánimen alǵashqy altyn dıskisin syılyq retinde aldy.
«Osy jyldyń sáýir aıynda men baıqaýdyń oblystyq kezeńinen óttim. Oǵan menimen birge Atyraý oblysynan 200 jas oryndaýshy qatysty. Biraq, óz óńirimniń namysyn úlken sahnada qorǵaýǵa múmkindik aldym. Men 2-ryndy ıelengenim úshin esh ókinbeımin. Óıtkeni, bul men úshin úlken tájirıbe boldy. Endi men óz bolashaǵymdy mýzykamen baılanystyratynyma senimdimin»,- deıdi Alfııa Tilekqabyl.
Alfııa - «Melodııa» teatr stýdııasynyń oqýshysy, eki jyldan beri ustazy Anıa Tsatınıannyń basshylyǵymen vokalmen aınalysýda. Baıqaýda Alfııamen birge belgili qazaq ánshisi Dınara Sultan án shyrqady. Alfııa - erekshe bala. Kishkentaı kúninen kózi kórmese de, keremet estý qabileti men ásem daýysy bar.
«Deni saý balalarmen qatar óner kórsetý úshin úsh ese kóp jumys isteý qajet. Bul óte qıyn, biraq biz tyrysyp jatyrmyz. Baıqaý joǵary deńgeıde ótti. Balalar 11 qazannan bastap juldyzdy úıde boldy, onda tájirıbeli ustazdar men sheberler olarmen jumys istedi. Alfııa birden estrada juldyzdarymen kezdesip, úlken shabyt pen kóptegen jaǵymdy emotsııalar aldy. Qyzymyzdyń bolashaǵy áli alda, sondyqtan ekinshi oryn - kelesi jeńisterge degen yntalandyrý»,- deıdi anasy Janargúl Nyǵmetova.
Aıta keteıik, Alfııa tek vokalmen ǵana aınalyspaıdy, sonymen qatar kásibı túrde fortepıanoda oınaıdy. Otbasynyń kenjesi. Alfııanyń úsh aǵasy bar.
