«Bala daýysy» ulttyq baıqaýynyń úshinshi maýsymy bastalady
ASTANA. QazAqparat -Álııa Nazarbaevanyń biregeı jobasy - «Bala daýysy» ulttyq balalar baıqaýynyń úshinshi maýsymyna irikteý kezeńi bastaldy, dep habarlaıdy «QazAqparat» HAA tilshisi.
Balalar baıqaýyn qazaqstandyqtar 27 qazannan bastap ár senbi saıyn KTK telearnasynan tamashalaıtyn bolady. Baıqaýdyń ótýine QR Mádenıet jáne sport mınıstrligi men Elbasy - QR Tuńǵysh Prezıdent qory qoldaý kórsetip otyr.
Bıylǵy baıqaý jańa formatta ótkizilmek. Ónerli balalardy barynsha qamtý maqsatynda 15 naýryzdan 15 sáýir aralyǵynda baıqaýdyń resmı saıtynda (https://ru.notka.kz/ ) onlaın túrde irikteý kezeńi ótedi. Óner dodasyna 8-12 jas aralyǵyndaǵy balalar qatysa alady. 18 úzdik ónerpaz ǵana baıqaýdyń sýper-fınalyna joldama alady.
«Jandaný álemi» Qorynyń basqarma tóraǵasy Murat Isahanov Astanada ótken baspasóz máslıhatynda irikteý nelikten onlaın túrde júrgizilip jatqanyn aıtyp berdi.
«Biz eki jyl boıy búkil aımaqtardy araladyq. Tájirıbe kórsetip otyrǵandaı, balalardyń barlyǵy oblys ortalyǵyna jete almaı jatady. Osy sebepti, irikteý kezeńin onlaın túrde ótkizý jón dep sheshtik. Buryn úsh ret tikeleı efır ótkizsek, bıyl alty tikeleı efırdi ótkizýdi josparlap otyrmyz», - deıdi ol.
Qazaqstandyqtar 27 qazannan 1 jeltoqsanǵa deıin tikeleı efırde unaǵan ónerpazǵa daýys bere alady.
«Týra eki jyl buryn baıqaý jaıly estip baǵymyzdy synap kórdik. Men ótken jyly úzdik úshtiktiń qatarynan kórindim. Sol kezde tóreshiler maǵan shyńdalýǵa keńes berdi. Tóreshilerdiń aqylymen fınalǵa óttim», - deıdi ótken jyly aqtyq kezeńge shyqqan ıAsmın Nurmaqova.
