«Bala daýysy» baıqaýynyń 6-shy maýsymyna irikteý bastaldy
ALMATY. QazAqparat - «Bala daýysy» ulttyq balalar án konkýrsynyń altynshy maýsymyna irikteý qashyqtan ótedi, dep habarlaıdy QazAqparat tilshisi.
QR Mádenıet jáne sport mınıstrligi, Nursultan Nazarbaev Qory 8-12 jas aralyǵyndaǵy daryndy balalardy «Bala daýysy» ulttyq balalar án baıqaýynyń altynshy maýsymyna qatysýǵa shaqyrady.
17 fınalıstti anyqtaıtyn qashyqtan irikteý kezeńi 25 naýryz ben 15 mamyr aralyǵynda ótedi. Kastıngke qatysýdyń barlyq sharttary www.baladauysy.kz saıtynda ornalastyrylǵan, sondaı-aq, ótinimderdi qabyldaý kezeńi qazirden bastaldy.
1 maýsym men 1 qazan aralyǵynda «Bala daýysy» fınalyna daıyndyq kezeńi ótedi: fınal qatysýshylaryna vokal, akterlik sheberlik, horeografııa boıynsha jeke sabaqtar ótkiziledi; qaıtalanbas jáne erekshe sahnalyq beıneni jasaý maqsatynda rejısserler, grafıka jáne jaryq sýretshileri, dızaınerler, stılıstter olarmen jumys isteıdi.
Baıqaýdyń fınaly 7 jáne 9 qazan kúnderi Nursultan qalasynda ótedi. Bıylǵy jyly baıqaýdyń kontserttik baǵdarlamasynyń formaty birshama kúrdelengen - balalar qazaqstandyq jáne sheteldik estradanyń tanymal hıtterin bend súıemeldeýimen oryndaıtyn bolady.
Baıqaýdyń barlyq kezeńderine balalardyń qatysýy tegin. Іrikteý kezeńiniń árbir qatysýshysy ataýly dıplomdar alady, fınalısterge baǵaly syılyqtar beriledi.
«Bala daýysy» baıqaýynyń jeńimpazy alǵashqy kúnderinen bastap joba avtory jáne «Jandaný álemi» qorynyń quryltaıshysy Álııa Nazarbaeva taǵaıyndaǵan ataýly bilim berý grantynyń ıegeri bolady. Sondaı-aq, baıqaý qorytyndysy boıynsha jańa balalar ánderiniń jınaǵy shyǵarylady, onyń avtorlary elimizdiń 14 oblysy, Shymkent, Almaty jáne Nur-sultan qalalarynyń balalar shyǵarmalyshyǵy kompozıtorlary bolady.
Barlyq jańa ánder jáne de aldyńǵy maýsymdarda jazylǵan ánder «Bala daýysy» saıtynda qoljetimdi bolady.
