Bala damýyndaǵy kidiristerdi erte anyqtaıtyn ortalyqtar sany 386-dan asty
ASTANA. KAZINFORM — Densaýlyq saqtaý mınıstrligi balalarǵa arnalǵan damý jáne erte aralasý ortalyqtarynyń jelisin keńeıtip jatyr.
Mınıstrliktiń baspasóz qyzmeti atap ótkendeı, negizgi basym baǵyttardyń biri — profılaktıkalyq kómekti damytý jáne balalardyń damýyndaǵy buzylystardy erte anyqtaý.
Qazaqstanda balany týǵan sátinen bastap erte jasyna deıin keshendi súıemeldeýge baǵyttalǵan «Alǵashqy 1001 kún» jobasy iske asyrylyp jatyr. Joba patronaj qyzmetin damytýdy, skrınıngtik baǵdarlamalardy keńeıtýdi, ana sútimen qorektendirýdi qoldaýdy jáne erte shaqtaǵy balalardyń ulttyq tirkelimin qalyptastyrýdy qamtıdy.
2025 jyldan bastap elimizde Dúnıejúzilik densaýlyq saqtaý uıymynyń (DDU) GMCD balalardyń damýyn monıtorıngileý jónindegi nusqaýlyǵy engizilip keledi. Bul qural balalardaǵy damý kidirisiniń qaýipterin klınıkalyq belgileri paıda bolǵanǵa deıin anyqtaýǵa múmkindik beredi.
— Sońǵy bir jyldyń ishinde Qazaqstanda medıtsınalyq-sanıtarııalyq alǵashqy kómek (MSAK) uıymdarynyń bazasynda jumys isteıtin, balalardyń damýyndaǵy buzylystardy erte dıagnostıkalaýǵa jáne olardy keshendi súıemeldeýge baǵyttalǵan 386-dan astam damý jáne erte aralasý ortalyǵy quryldy. Ortalyqtarda balalarmen dárigerler, logopedter, psıhologter, reabılıtologter jáne basqa da mamandardan quralǵan mýltıdıstsıplınarlyq komandalar jumys isteıdi, — delingen habarlamada.
Sonymen qatar ata-analarǵa da jan-jaqty qoldaý kórsetiledi: olardy bala kútimi daǵdylaryna úıretedi, balanyń damýyna qatysty konsýltatsııa beredi jáne medıtsınalyq kómek kórsetýdiń barlyq kezeńinde súıemeldeıdi.
Vedomstvo málimetinshe, erte aralasý balalar múgedektiginiń qaýpin tómendetýge, balanyń ómir súrý sapasyn jaqsartýǵa, onyń tabysty damýy men qoǵamǵa beıimdelýine qolaıly jaǵdaı jasaýǵa múmkindik beredi. Kómek neǵurlym erte bastalsa, balanyń óz áleýetin tolyq ashýyna soǵurlym múmkindik joǵary bolady.
Buǵan deıin habarlanǵandaı, Oljas Bektenov aýtızmge shaldyqqan balalardyń kóbeıý sebebin atady.
