Bala balabaqsha men mektepke 5 kúnge deıin barmaǵan jaǵdaıda, anyqtama qajet emes - feık
ASTANA. KAZINFORM - DSM Sanıtarııalyq-epıdemıologııalyq baqylaý komıteti jelide taraǵan derekke qatysty málimet taratty.
«Vırýstyq ınfektsııalar jıilep jatqan kezeńde naýqastanýyna baılanysty balalar balabaqsha men mektepke 5 kúnge deıin barmaǵan jaǵdaıda anyqtama alýdyń qajettiligi bolmaıdy dep áleýmettik jelilerde taralǵan aqparat Qazaqstan Respýblıkasynyń aýmaǵynda qabyldanbaıdy.
Búgingi tańda «Mektepke deıingi tárbıe men balalar úıine qoıylatyn sanıtarııalyq-epıdemıologııalyq talaptar» sanıtarııalyq erejelerine sáıkes balalar úsh jáne odan da kóp kún sabaqta bolmaǵan jaǵdaıda, olar mektepke deıingi mekemelerge densaýlyǵy týraly dárigerdiń anyqtamasymen qabyldanady», — dep túsindirdi vedomstvodan.
Derekke qaraǵanda, «Bilim berý obektilerine qoıylatyn sanıtarııalyq-epıdemıologııalyq talaptar» sanıtarııalyq qaǵıdalaryna sáıkes jekelegen jiti aýrýlarǵa shaldyqqan bilim alýshylar men tárbıelenýshiler baqylaýǵa jáne saýyqtyrýǵa jatady.
«Dáleldi sebeptermen sabaqty jiberip alý bilim berý uıymynyń (mekteptiń) ishki tártibimen aıqyndalady.
Barlyq azamattardy resmı aqparat kózderinen senimdi aqparatqa senýge shaqyramyz!» — delingen komıtet aqparatynda.
