Bala asyrap alýshylar úshin qurylǵan jetim balalardyń málimetter banki QR-nyń sheteldegi uıymdarymen yntymaqtasatyn bolady
ASTANA. QazAqparat - Búgin QR Bilim jáne ǵylym vıtse-mınıstri E.Imanǵalıevtiń basshylyǵymen jetim balalar men ata-anasynyń qamqorlyǵynsyz qalǵan balalardyń respýblıkalyq málimetter bankiniń tusaýkeseri ótti, dep habarlanǵan QR Bilim jáne ǵylym mınıstrliginiń saıtynda.
Tusaýkeserge QR Parlamenti Májilisiniń depýtattary, úkimettik emes uıymdardyń ókilderi qatysty.
Aıta keteıik, «Mereıli otbasy» ulttyq baıqaýynyń jeńimpazdaryn quttyqtaý saltanatynda Elbasy tarapynan jetim balalar men ata-anasynyń qamqorlyǵynsyz qalǵan balalarǵa biryńǵaı ulttyq málimetter bankin qurý týraly tapsyrma berilgen edi. Búgingi tańda jetim balalar men ata-anasynyń qamqorlyǵynsyz qalǵan balalardyń respýblıkalyq málimetter bankin qurý boıynsha jumystar júrgizilýde. Málimetter banki respýblıka óńirleriniń deńgeıinde qalyptasqan aqparattyq resýrstar jıyntyǵyn, sonymen qatar óz otbasylaryna balalardy asyrap alýǵa tilek bildirgen azamattar úshin otbasynda tárbıelenýge jatatyn balalar týraly qujattandyrylǵan aqparattardy qaıta óńdeý jáne jınaqtaý, qor jınaý, saqtaý, jetkizý sııaqty úrdisterdi iske asyratyn aqparattyq tehnologııalardy qamtıdy. Atalǵan málimetter banki ortalyq jáne jergilikti deńgeıde múddeli memlekettik organdarmen, sondaı-aq Qazaqstan Respýblıkasynyń sheteldik uıymdarymen balalardy esepke alýda, keleshekte olardy otbasylarǵa ornalastyrýda ózara yntymaqtastyqty qamtamasyz etedi. Aǵymdaǵy jyldyń sońyna deıin atalǵan júıeni pılottyq rejımde Astana qalasynda júrgizý josparlanýda. 2016 jyly qamqorshylyq jáne qorǵanshylyq bóliminiń mamandary úshin atalǵan júıemen jumys jasaý, sondaı-aq respýblıkanyń barlyq óńirlerinde júıeni kezeń-kezeńmen engizýde tájirıbeli paıdalaný úshin semınarlar ótkiziledi. Jetim balalar men ata-anasynyń qamqorlyǵynsyz qalǵan balalardyń respýblıkalyq málimetter bankiniń qyzmeti 2017 jylǵy qańtar aıynan bastalady.
