Bala asyrap alýda keıbir úderisterdiń krımınaldanýy erekshe alańdatyp otyr - Andreı Kravchenko

ASTANA. QazAqparat - QR Bas prokýrorynyń orynbasary Andreı Kravchenko elimizde bala asyrap alýda keıbir úderisterdiń krımınaldanýyna alańdaýly ekenin aıtty.

Búgin Astanada Halyqaralyq adam quqyqtary kúnine arnalǵan dóńgelek ústelde sóılegen sózinde ol qadaǵalaýshy vedomstvolardyń negizgi kúsh-jigeri elimizdegi jetim balalar men ata-anasynyń qamqorlyǵynsyz qalǵan búldirshinderdiń quqyǵyn qamtamasyz etýge baǵyttalǵanyn atap ótti.

«Asyrap alý rásimderiniń kúrdeli bolýynan keıbir balalardyń osy úderisterge qol jetkize almaǵanyn kórdik. Biz tárbıeleý men qamqorshylyq organdaryna tizimdegi 1,2 myńǵa jýyq balany budan ary qaraı asyrap alýǵa quqyǵyn qalpyna keltirýdi usyndyq. Sonymen qatar bala asyrap alýda keıbir úderisterdiń krımınaldanýy bizdi erekshe alańdatyp otyr. ıAǵnı, bul turǵyda jańa týǵan náresteni asyrap alýǵa zańsyz bergizý úshin resmı qujattardy qoldan jasaý nemese alaıaqtyq faktilerin anyqtaýdamyz»,-dedi A. Kravchenko.

Sonymen qatar ol Bas prokýratýranyń bastamasymen qoldanystaǵy zańnamaǵa birqatar túzetýler engizilip, soǵan sáıkes, baspasyz jetim balalar memlekettik turǵyn úı qorynan birinshi kezekte páter alý quqyǵyna ıe bolǵanyn eske salyp ótti.

«Osy túzetýlerden keıin, myńnan astam jetim bala memleketten baspana aldy. Biz jergilikti atqarýshy organdarda baspanaǵa muqtaj 4 myńnan astam jetim balalardy esepke qoıýdy qamtamasyz ettik»,-dedi A. Kravchenko.