Bala asyrap alý protsesi tym uzaq - Gennadıı Shıpovskıh
ASTANA. KAZINFORM – Senator Gennadıı Shıpovskıh óziniń depýtattyq saýalynda bala asyrap alýdaǵy ákimshilik kedergiler men ata-ananyń qamqorlyǵynsyz qalǵan balalardy qorǵaý júıesiniń tıimsizdigine baılanysty problemalardy atap ótti.
- Oqý-aǵartý mınıstrliginiń málimetinshe, qazir elimizde 21 387 jetim jáne ata-anasynyń qamqorlyǵynsyz qalǵan bala bar. Memleketimiz balalar úıinde tárbıelenip jatqan jetim balalardy otbasylyq ortaǵa ornalastyrý úshin túrli sharalar qabyldap otyr. Alaıda, statıstıkalyq derekterge qaraǵanda, bala asyrap alý úrdisi baıaý júrip jatyr. Máselen, 5 myńnan astam azamat bala asyrap alý kezeginde turǵanymen, 2023 jyly – 194, 2024 jyly – 153 bala jańa otbasyn tapqan. Bul kórsetkishter bala asyrap alý júıesindegi ákimshilik kedergilerdiń bar ekenin jáne protsestiń uzaqqa sozylatynyn ańǵartady, - dedi G. Shıpovskıh Senattyń jalpy otyrysynda.
Onyń aıtýynsha, memleket tarapynan qabyldanyp jatqan baǵdarlamalar men zańnamalyq is-sharalar jetim balalardyń shynaıy qajettilikterine saı bolýy kerek.
- Ókinishke qaraı, kóptegen jetimderimiz balalar úıinde tárbıelenip, otbasynyń jylýyn sezinbeı ósedi. Bul olardyń bolashaqta qoǵamǵa beıimdelýin qıyndatady. Bala asyrap alý rásimin jeńildetý jáne ony tsıfrlandyrý, qujattardy rásimdeý men qajetti tekseristerdi onlaın formatta ótkizý arqyly úmitkerler úshin protsesti ońaılatý qajet. Jetim balalardy otbasylyq ortada tárbıeleý saıasatyn kúsheıtý, qamqorshylyq pen patronattyq tárbıe júıesin jetildirý, patronattyq tárbıeshilerge tólenetin qarjylyq qoldaýdy arttyrý mańyzdy. Qoǵamdyq baqylaýdy kúsheıtý jáne asyrap alý protsesiniń ashyqtyǵyn qamtamasyz etý úshin úkimettik emes uıymdar men qoǵam belsendilerin tartý kerek. Bala asyrap alý salasyndaǵy zańsyzdyqtarǵa kúresti kúsheıtý qajet, sybaılas jemqorlyq táýekelderin azaıtý úshin qatań baqylaý sharalaryn engizý mańyzdy», - dedi Gennadıı Shıpovskıh.
Budan buryn habarlanǵandaı, jetim jáne ata-anasynyń qamqorlyǵynsyz qalǵan balalarǵa memlekettik turǵyn úı qorynan berilgen turǵyn úı-jaılardy jekeshelendirý quqyǵy berildi.