Bala aqyn Jambyl shynymen 13-inde otaý tikpek pe
ASTANA. QazAqparat - 7 jasynda alǵashqy óleńin jazyp, az ýaqyttyń ishinde halyq arasynda tanymaldyqqa ıe bolǵan Jambyl Dúısenovtiń 13 jasynda shańyraq kóteretindigi jaıynda aqparat taraǵan bolatyn.
Osyǵan oraı, QazAqparat tilshisi aqparattyń aq-qarasyn anyqtaý úshin Jambyldyń anasy Kámshat Ibraıymovaǵa habarlasqan edi.
«Anasy retinde aıtarym, bul aqparat múldem shyndyqqa janaspaıdy. Ózim pedagogpyn. QazMÝ-dyń fılıogııa fakýltetin bitirgenmin. Men balama mundaı tárbıe esh ýaqytta bermes edim. Jambyl - bul bútin qazaq kózin tigip otyrǵan bala. Bizdiń eskini jańǵyrtý oıymyzda joq. Ár nárse óz ýaqytymen», - deıdi Jambyldyń anasy Kámshat Ibraıymova.
Bala aqynnyń anasy Jambyldyń erteń ótetin shyǵarmashylyq keshinde «Móldir monshaq» degen ánniń oryndalatyndyǵyn atap ótti.
«Shyǵarmashylyq keshinde «Móldir monshaq» degen ániniń oryndalatyndyǵy ras. Bul birinshi shyǵarǵan týyndysy, tusaýy kesiledi. Qazir onyń kompozıtorlyqpen de áýestenip júrgeni shyndyq. Áńgime osy ánnen shyqqan sııaqty. Biraq, ol eshkimge arnalmaǵan. Jambyldyń eki kitaby jaryq kórdi. Endi mine, úshinshi kitaby daıyn tur. Mádenıet jáne sport mınıstrliginiń qoldaýymen jaqyn arada «Óleńim - ómirim» degen atpen shyǵady. Tuńǵysh kitaby «Táńirden kelgen tátti syı» degen ataýmen aýdıo túrinde shyǵyp, balabaqshalarǵa taratyldy. Ekinshi kitaby Elbasy qorynyń qoldaýymen «Perishte tilek» degen atpen jarııalandy», - dedi Kámshat Ibraıymova.
Aıta keteıik, bala aqyn Jambyl Dúısenovtiń 13 jasynda shańyraq kóteretindigi jaıynda aqparat aldymen Instagram-da jarııalanyp, artynan ony birqatar aqparat agenttikteri jarııalaǵan bolatyn. Onda: «Ata-baba dástúri boıynsha 13 jasta otaý ıesi bolý maqsatynda halqymyzdyń salt dástúri men ádet-ǵuryppen bolashaq kelinge syrǵa saldy. 30 qarashada ótetin keshinde Jambyldyń kelin balaǵa arnalǵan «Móldir monshaq» áni oryndalady», - delingen edi.
