Bala 1,5 jasqa tolǵannan keıin jumyssyzdyq tólemin alý týraly aqparat jalǵan
ALMATY. KAZINFORM – Áleýmettik jeliler men messendjerlerde bala 1,5 jasqa tolǵannan keıin áıelderdiń jumyssyzdyq boıynsha áleýmettik tólemderdi rásimdeı alatyny týraly shyndyqqa sáıkes kelmeıtin aqparat tarap jatyr.
Mundaı habarlamalardyń avtorlary azamattarǵa alty aı boıy tólem alý úshin mansap ortalyǵynda jumyssyz retinde tirkelýdi usynady.
Eńbek jáne halyqty áleýmettik qorǵaý mınıstrligi bul «shemanyń» zańdy negizi joq ekenin jáne ol azamattardy jańylystyratynyn resmı túrde túsindiredi.
— Qoldanystaǵy zańnamaǵa sáıkes, bala kútimi boıynsha demalysta otyrǵan áıeldiń jumys orny saqtalady, sondyqtan ol jumyssyz dep tanylmaıdy. Jumyssyz mártebesi tek naqty jumys izdep júrgen jáne jumysqa kirisýge daıyn adamdarǵa ǵana beriledi.
Sondaı-aq jumysynan aıyrylý boıynsha áleýmettik tólem tek mindetti áleýmettik saqtandyrý júıesine qatysýshylarǵa taǵaıyndalatynyn eske salamyz. Olar jumyssyz retinde tirkelip, belgilengen talaptardy oryndaýy tıis. Tólem alýshy jumysqa ornalasqan jaǵdaıda bul týraly mansap ortalyǵyn ýaqtyly habardar etýge mindetti. Eger jalǵan málimetter usynylsa, tólengen qarajat zańnamada belgilengen tártippen qaıtarylatyn bolady, — delingen Eńbekmıni taratqan habarlamada.
Mınıstrlik sondaı-aq áleýmettik tólemderdi alý maqsatynda ádeıi jalǵan málimetter berý alaıaqtyq retinde baǵalanýy múmkin ekenin eskertedi. Osyndaı jalǵan nusqaýlyqtardy taratatyn tulǵalar da jaýapkershilikke tartylýy yqtımal.
— 2025 jyly elimizdiń 12 óńirinde alaıaqtyq faktileri boıynsha 30-dan astam qylmystyq is qozǵaldy. Bes óńirde qazirdiń ózinde 7 sot úkimi shyǵaryldy. Tergeý barysynda azamattardyń áleýmettik jelilerdegi (sonyń ishinde Instagram-daǵy) jarnamalyq jarııalanymdarǵa senip, áleýmettik tólemderdi zańsyz alý shemalaryna tartylǵany anyqtaldy.
Osyǵan baılanysty azamattardy messendjerler men áleýmettik jelilerdegi beıtanys adamdarǵa senbeýge, jeke derekterin bógde tulǵalarǵa bermeýge jáne aqparattyń tek resmı kózderin paıdalanýǵa shaqyramyz, — delingen mınıstrlik habarlamasynda.
Eske salsaq referendým aldynda jalǵan vıdeomaterıaldar tarap jatqany týraly jazǵan edik.