Baqytjan Jumaǵulov: Ǵalymdardyń shyǵarmashylyq erkindigi men jaýapkershiligin arttyrý qajet
«Bárimiz ǵylymdy damytýdaǵy ǵalymdardyń jeke rólin, shyǵarmashylyq erkindigin, jaýapkershiligin arttyrýdy basty nazarda ustaýymyz kerek dep bilemin. Sol sııaqty Ulttyq ǵylymı keńesterdiń fýnktsııalary, quqyqtary men múmkindikteri tek zań normalarymen ǵana belgilengeni jón. Onsyz «bıýrokratızm» menen «jeke múddeni kózdeýshilikten» aryla almaımyz. Ony toqtatý qajet. Búgingi tańda ǵalymdardyń jıi aıtyp júrgeni de osy», - dedi ol ǵylym jónindegi zań jobasy talqylanǵan Senat otyrysynda.
Baqytjan Jumaǵulov sonymen qatar nazar aýdarar taǵy bir másele jaıly sóz qozǵady.
«Kezinde Qazaqstan ǵylymynyń bedelin kóterý úshin ǵylymı maqalalardy sheteldik basylymdarda jarııalaýǵa basym baǵyt berdik. Ǵylymı maqalalardyń sanyn arttyrýǵa tyrystyq. Árıne, bul baǵytta jetistikterimiz de joq emes. Alaıda kemshilikter de bar. Búgingi tańda ǵalymdardyń eńbegin baǵalaý tek qana osy krıterııge baılanyp qaldy. Osynyń saldarynan qomaqty qarjy jáne uzaq ýaqyt salyp, ǵylymı maqalalardy batys basylymdaryna «tyqpalap» jarııalaý qalyptasty. Bul Qazaqstannyń ǵana emes, búkil postkeńestik respýblıkalardyń ǵylymı ıdeıalary men qarjylary deldaldardyń paıdasyna jumys jasap jatyr degen sóz. Ony – urlaýmen para-par dep túsinemin. Al biz bolsaq, ózimizdiń otandyq ǵylymı jýrnaldardy esepke almaıtyn boldyq. Osylaı óz jýrnaldarymyzdyń quny ketti. Endi ýaqyt ozdyrýǵa bolmaıdy. Taıaý arada bul máseleni sheshken jón. Olaı bolmaǵan jaǵdaıda, qazaqstandyq ǵalymdar baıaǵy Keńes odaǵy tusyndaǵy sekildi endi batystyq júıeniń kóleńkesinde qala beredi», - dedi ol.
