Baqytjan Jumaǵulov: AMANAT – halyq senimi, qoǵam tiregi

NUR-SULTAN. QazAqparat – AMANAT - halyq senimi, qoǵam tiregi, jaýapkershilik pen ádilettilik kepili. Mundaı pikirdi Senat depýtaty Baqytjan Jumaǵulov bildirdi, dep habarlaıdy QazAqparat tilshisi.

«Qańtar qasiretine qaramastan QR Prezıdenti Qasym-Jomart Toqaev saılaýaldy baǵdarlamasynda aıtylǵan ekonomıkalyq jáne saıası reformalardy odan ári jalǵastyryp keledi. Memleket basshysynyń álemdik deńgeıdegi saıası tulǵa ekenin zaman kórsetip otyr. Ol Táýelsiz elimizdiń 30 jylda jetken tabystaryn aıta otyryp, jańa Qazaqstannyń jańa máselelerin aıqyndady. Syn saǵaty kezinde taısalmady. Babalar armany - Táýelsizdikti saqtap qaldy. Osylaı óziniń tar kezeńde durys sheshim qabyldaı alatyn, jaýapkershilikten qashpaıtyn iri saıası tulǵa ekenin tanytty. Prezıdent saılaýynda jeńiske jetken kúnnen bastap qoǵamdyq ómirdiń bar salasyn reformadan ótkizý saıasatyn júrgizdi. Endi qoǵam da, adam da burynǵydaı ómir súre almaıtynyn bildi», - dedi ol.

Senator sondyqtan da Memleket basshysy Qazaqstandy jańǵyrtý jolyn tańdaǵanyn aıtady.

«Osylaısha «Halyq únine qulaq asatyn memleket» kontseptsııasy jasaldy. Odan keıin jańa Qazaqstan joly tańdaldy. Bul ne? Qandaı baǵyt? Bul jaıly sońǵy jyldary ekonomıkada saıası reforma turǵysynda jasalǵan alǵashqy qadamdardy aıtsaq ta jetkilikti. Aýyl ákimderiniń saılaýy ótti, saıası partııalardyń rólin kóterýge baǵyttalǵan zańnamalyq qadamdar da jasaldy. Endi aýdan ákimderi saılanatyn bolady. Kóleńkeli ekonomıkamen kúres, korrýptsııany quryqtaý, ádil qoǵam qurý maqsaty da qoıyldy. Mine, osy jolda Memleket basshysy jańa baǵyt, jańa jol tańdady. Aldaǵy ýaqytta jarııa etiletin Jańa Qazaqstannyń jańa jolyn halyq asyǵa kútedi», - dedi ol.

Sondaı-aq senator búgingi «Nur Otan» partııasynyń kezekten tys sezinde uıym ataýyn «Amanat» dep ózgertýge qatysty oıymen bólisti.

«Endi partııanyń aty «Amanat» dep ózgertildi. Bul sózdiń astary men mazmuny tereń. Amanat - halyq senimi, qoǵam tiregi, jaýapkershilik pen ádilettilik kepili. Endi partııanyń aty ǵana ózgerip qoımaı, onyń jumys isteý tásilderi de jańǵyrady. Partııa men halyqtyń birligi artady. Ol qoǵamdyq ózgeristerdiń, bolashaqta júrgiziletin barlyq júıelik ózgeristerdiń basynda turatyn jańa partııa bolmaq», -dedi Baqytjan Jumaǵaulov.