Baqytjan Jumaǵulov aqmolalyq dárigerlermen kezdesti
KÓKShETAÝ. QazAqparat - QR Parlamenti Senatynyń depýtaty Baqytjan Jumaǵulov Aqmola oblysyna jumys sapary barysynda Kókshetaýdaǵy oblystyq kópbeıindi aýrhananyń «júrek ortalyǵynda» boldy, dep habarlaıdy QazAqparat tilshisi.
Senator medıtsınalyq mekemeniń kardıologııa, kardıohırýrgııa jáne rentgen endovaskýlıarly hırýrgııa bólimshelerin aralap kórdi, sondaı-aq, Aqmola oblystyq kópbeıindi aýrhananyń bas dárigeri Nurlan Jarov pen kardıohırýrgııa bólimshesiniń basshysy Nurlan Myńaıdarovpen sóılesti.
Baqytjan Jumaǵulov ortalyqta júrekke jasalyp jatqan otalar týraly surap bildi. Ortalyq basshylarynyń aıtýynsha, ortalyqta rentgenendovaskýlıarly hırýrgııada 2000 astam ota, 200 – ge jýyq júrekke ashyq ota jasaldy. Munda eki hırýrg jumys isteıdi, olardyń árbireýine jylyna 100 otadan keledi.
Rentgenendovaskýlıarly hırýrgııa bólimshesiniń meńgerýshisi Birjan Aıtymovtyń aıtýynsha, mundaǵy jabdyqtarǵa 8 jyl bolǵan, jańartýdy qajet etedi. Qazirgi kezde, dárigerler ekinshi angıografqa muqtaj.
«Saý júrek» mektebinde Baqytjan Jumaǵulov medıtsınalyq qoǵamdastyqpen ótken kezdesýinde jumys saparynyń maqsaty týraly aıtyp berdi.
«Biz áleýmettik sala qyzmetkerleri: muǵalimdermen jáne dárigerlermen kezdesýge keldik. Kórip otyrǵanymyzdaı áleýmettik qamtamasyz etý baǵytynda aýqymdy jumystar atqarylǵan. Elimizde áleýmettik salaǵa erekshe kóńil bólinip otyrǵandyǵyn barshańyz bilesizder», - dedi ol.
Senatordyń sózinshe, respýblıka bıýdjetiniń 30 paıyzdan astamy áleýmettik salanyń úlesinde. Sonymen qatar, ol oblystyq aýrhanada naǵyz óz isiniń sheber mamandary jumysy isteıtindigin, soǵan qaramastan kadr jáne baspana máselesi baryn estip bilgenin atap ótti.
«Jalpy, oblystyń pedagogıkalyq qoǵamdastyǵy «Pedagog mártebesi týraly» zańyn joǵary deńgeıde qoldaıdy. Muǵalimder bul zańdy qoldap qana qoımaıdy, onyń úlken jaýapkershilik ekenin túsinip otyr. Memleket tarapynan pedagog mártebesin qamtamasyz etýde 5 jylǵa 5,4 trıllıon qarjy bólinip otyr. Keshe men jumyspen qamtý ortalyǵynda boldym. Onda da ataýly áleýmettik kómek taǵaıyndaýǵa qatysty birqatar máseleler aıtyldy. Búgingi tańda az qamtylǵan jáne kópbalaly otbasylardy qoldaý boıynsha memlekettik baǵdarlamalar bar. Densaýlyq saqtaý salasynda da ıgi ister az emes», - dep túıindedi sentor.
