Baqytjan Tájibaı: Dárigerdiń jaǵdaıynyń durys bolǵany naýqasqa tıimdi
«Qazaqstandyq densaýlyq saqtaý qyzmetkerleriniń salalyq kásibı odaǵy» qoǵamdyq birlestiginiń elordalyq fılıalynyń tóraǵasy Baqytjan Tájibaı bul shara dárigerdiń mártebesine sózsiz áser etedi dep sanaıdy.
«Men Memleket basshysynyń medıtsına qyzmetkerleriniń qylmystyq jaýapkershiligine qatysty máselesi boıynsha bastamasyn tolyq qoldaımyn. Bul medıtsına mamandary úshin jaǵymdy jańalyq boldy dep oılaımyn. Sońǵy ýaqytta qoǵamda medıtsına qyzmetkerleri men naýqastardyń arasyna jik salýshylar paıda bolǵany baıqalady. Bul durys kózqaras emes. Dárigerdiń maqsaty kómekke muqtaj jandarǵa qol ushyn sozý. Teorııalyq jáne praktıkalyq jaǵynan qaraǵanda medıtsınalyq kómekti minsiz etip uıymdastyrý múmkin emes. QR Qylmystyq kodeksinde «negizi bar táýekel» degen uǵym bar. Medıtsınalyq qyzmetkerler únemi osy táýekelde júredi», - deıdi Baqytjan Tájibaı.
Onyń aıtýynsha, Memleket basshysynyń bul ustanymy damyǵan memleketterdiń erejelerimen sáıkes keledi.
«Ádette emdik sharalar nátıjesin bermese naýqastar kinálini izdeı bastaıdy. Osyndaı kezde kinási joq dárigerlerdiń ózi ózine taǵylǵap aıypty moıyndaýy kerek bolady. Memleket basshysynyń bul ustanymy damyǵan memleketterdiń erejelerimen sáıkes keledi. Naýqas zardap shekse, ol úshin ıýireý daýap berýi kerek. Medıtsına qyzmetkeri qylmystyq jaýapqa tartylǵany durys emes, ol quqyqtyq nemese ákimshilik jaýapqa ǵana tartylýy kerek. Medıtsınalyq járdemniń maqsaty – adamnyń densaýlyǵyn qalpyna keltirý. Prezıdent aıtqandaı, medıtsına qyzmetkeri zańdyq jáne qarjylyq turǵyda qorǵalǵan bolsa, ol dárigerdiń mártebesine de áser etedi», - deıdi ol.
Baqytjan Tájibaı dárigerler jaýapkershiligin barynsha arttyryp, jumys orny qaýipsiz bolýy úshin barlyq jaǵdaı jasalýy kerek ekenin aıtty.
«Dárigerdiń jalaqysy jaqsy bolýy kerek jáne biliktiligin arttyratyn, únemi, úzdiksiz oqý múmkindigi bolýy kerek. Munyń bári dárigerdiń qabileti men mártebesiniń ósýine yqpal etedi. Jumysta jaǵdaı jasalsa, medıtsınalyq qyzmetker joǵary jalaqy alsa, úzdiksiz oqysa, ol naýqas úshin de tıimdi. Osyndaı jaǵdaı jasalsa, medıtsınalyq kómektiń sapasy joǵary bolady. Profılaktıkalyq jumys júrgizilip, dáriger jiberetin qatelikter azaıady», - deıdi ol.
