Baqytjan Saǵyntaev jumys saparymen Almaty oblysyna bardy
ASTANA. QazAqparat - Qazaqstan Prezıdenti Nursultan Nazarbaevtyń tapsyrmasy boıynsha QR Premer-Mınıstri Baqytjan Saǵyntaev Memleket basshysynyń «Qazaqstannyń úshinshi jańǵyrýy: jahandyq básekege qabilettilik» Joldaýynda jáne «Bolashaqqa baǵdar: rýhanı jańǵyrý» baǵdarlamalyq maqalasynda qoıylǵan mindetterdiń júzege asyrylý barysymen tanysý, sonymen qatar QR Úkimetiniń elimizdiń áleýmettik-ekonomıkalyq damýy boıynsha atqaryp jatqan jumystaryn túsindirý úshin Almaty oblysyna jumys saparymen bardy.
QR Premer-Mınıstri aýyl sharýashylyǵy jáne ındýstrıaldyq kásiporyndarǵa, ınfraqurylymdyq nysandarǵa, bilim jáne medıtsına mekemelerin aralaıdy, dep habarlaıdy primeminister.kz.
QR Premer-Mınıstriniń jumys kestesindegi basty sharalardyń biri aımaqtaǵy qoǵam ókilderimen jáne bıznes-qaýymdastyqpen kezdesýi bolady.
Birinshi kezekte Baqytjan Saǵyntaev Taldyqorǵan qalasyndaǵy áýejaıdyń avıatsııalyq qaýipsizdigi qyzmetiniń jumysyn tekserip, ushý-qoný jolaǵyna, aerovokzal ǵımaratyna júrgizilgen rekonstrýktsııalaý men áýejaıdyń jańa avıareısterdi damytý boıynsha perspektıvalary týraly baıandamany tyńdady. Sonymen qatar QR Premer-Mınıstrine aımaqtyń týrıstik áleýetin arttyrý maqsatynda Úsharal qalasynda salynyp jatqan aerovokzal qurylysy týraly baıandaldy.
Qazirgi kezde Taldyqorǵan áýejaıynda jylyna 26 myń jolaýshyǵa qyzmet kórsetilip, 600 avıareıs ushyrylady. Áýe aılaǵynyń qazirgi aerodromdyq múmkindikteri Boeing-757, Il-76, TÝ-134, Chellendjer-850, AN-24, ıAK-40 tıpindegi ushaqtardy qabyldaýǵa múmkindik beredi.
Taldyqorǵannyń áýe aılaǵy Jetisýdyń áleýmettik-ekonomıkalyq damýy úshin úlken mańyzǵa ıe. Memleket astanasyna qatynap jatqan reıstermen qatar, munda el óńirlerine baǵyttalǵan áýe qatynastary da damý ústinde. Jaqyn arada Óskemen men Reseı Federatsııasynyń qalalaryna áýe reısteri ashylady. Óńirishilik mańyzdaǵy damyǵan baǵyttardy esepke ala otyryp, jappaı demalys oryndaryna - Alakól kóline - bul Qazaqstannyń ózge oblystary men kórshi elderden týrısterdiń kóptep kelýine múmkindik beredi.
Eske salaıyq, QR Premer-Mınıstri Baqytjan Saǵyntaevtyń Qazaqstan aımaqtaryna sapary jalǵasýda. Buǵan deıin ol Shyǵys Qazaqstan, Batys Qazaqstan jáne Aqtóbe oblystaryn aralady.
