Baqytjan Saǵyntaev jekeshelendirýdi tıimdi júrgizýdi tapsyrdy

ASTANA. QazAqparat - QR Úkimet basshysy Baqytjan Saǵyntaev memlekettik menshik obektilerin satý jumysyn barynsha paıdamen júrgizý qajettigin aıtty, dep habarlaıdy QazAqparat tilshisi.

Búgingi Úkimet otyrysynda Qarjy mınıstri Álıhan Smaıylov qazirgi ýaqytta jekeshelendirýdiń keshendi josparynyń 887 obektisiniń 524-i saýda-sattyqqa shyǵarylyp, olardyń 444-i satylǵanyn atap ótti. Satý baǵasy 253 mlrd teńgeni quraǵan.

«287 nysan qaıta uıymdastyrylý jáne taratylý satysynda 12 obektini jekeshelendirý obektileriniń tizbesinen alyp tastaý týraly QR Ekonomıkany jańǵyrtý máseleleri jónindegi memlekettik komıssııanyń sheshimi qabyldandy. Qaıta uıymdastyrylatyn jáne taratylatyn obektilerdi qosa eseptegende, jekeshelendirýdiń keshendi josparynyń oryndalýy búginde 84 paıyz deńgeıinde qalyptasty. Osy jyly 257 obekt satylymǵa shyǵarylmaq. Іs júzinde 142 obekti saýda-sattyqqa shyǵarylyp, 47 obekti boıynsha qaıta uıymdastyrý jáne taratý týraly sheshim qabyldandy. Satylymdaǵy obektilerdiń ishinen osy jyly 63-i satyldy. Satý baǵasy 74 mlrd teńgeni qurady», - deıdi Álıhan Smaıylov.

Mınıstrdiń baıandamasyn tyńdaǵan Úkimet basshysy belgilengen nysandardy satý keste boıynsha júrgizilip jatqanyn aıtty.

«Alaıda Qarjy mınıstriniń (Álıhan Smaıylov- avt.) baıandamasynda aıtylǵan keıbir nysandardy jekeshelendirýdiń sozylyp ketkenine mınıstrlikter, jergilikti atqarýshy organdar men holdıngter nazar aýdarýy kerek. Nysandardy satýǵa qoıýdy jyldamdatýlary qajet. Jekeshelendirýdi memleket úshin barynsha tıimdi júrgizý qajet. Bul Elbasynyń tikeleı tapsyrmasy», - dedi Baqytjan Saǵyntaev.

Premer-Mınıstr bul máseleni retteýdi óziniń orynbasary Erbolat Dosaevqa tapsyrdy.