Baqytjan Saǵyntaev «Jas qanat» úılerine otandyq materıaldy qoldanýǵa pármen berdi
ALMATY. QazAqparat - Baqytjan Saǵyntaev Almaty qalasynyń Túrksib aýdanyn aralaǵan kezde «Jas qanat» turǵyn úı kesheniniń qurylysyn baqylady, dep habarlaıdy QazAqparat tilshisi.
Ákim «Jas qanat» móltekaýdanynda áleýmettik nysandar men turǵyn úı salý, eski úılerdi súrý jónindegi baǵdarlamany júzege asyrý máselelerin talqylady.
B.Saǵyntaev qurylys basqarmasyna otandyq ónimderdi paıdalaný boıynsha qurylys kompanııalaryna baqylaýdy kúsheıtýdi tapsyrdy.
Aýdandyq ákimdikke B.Hmelnıtskıı kóshesi boıyndaǵy aımaqty abattandyrý, skverdi úńgileý, «Jas qanat» móltekaýdanynyń aýmaǵyn qosymsha kógaldandyrýdy tapsyrdy.
Sonymen qatar qalalyq Mobıldilik basqarmasymen birge Baımaǵambetov kóshesinen jańa turǵyn úılerge deıin jol salý máselesin sheshýge pármen berdi.
«Jas qanat» móltekaýdanynda «Nurly jer» baǵdarlamasy boıynsha kópáterli jeti turǵyn úı, 280 oryndy balabaqsha salynýda. Qurylys obektilerin bıylǵy jyldyń qyrkúıeginde bitirý josparlanǵan.
Sondaı-aq, ákim Túrksib aýdanynyń turǵyndarymen kezdesti, turǵyn úı kommýnaldyq sharýashylyq, aýlalardy abattandyrý, qoǵamdyq qaýipsizdikti qamtasyz etý boıynsha olar aıtqan shaǵymdar men usynystardy tyńdady.
Búginde Túrksib aýdanynda 16 eski úı súrilip, olardyń ornyna 803 páterli 39 úı salynǵan. Baǵdarlamany jalǵastyrý boıynsha taǵy 28 úı anyqtaldy.
147 aýla kúrdeli jóndeledi, 15 kóshe jańaryp, 8 km trotýar, 2,6 km aryq jelisi (2 kóshe) salynyp, uzyndyǵy 7,8 shaqyrym kóshege jóndeý júrgiziledi.
Sondaı-aq, qala ákimi «Almaty-1» temirjol vokzalynyń jumysymen tanysqan bolatyn.
Onyń barysynda B.Saǵyntaevqa vokzal qaıta jóndelse, onyń ótkizý qabileti táýligine 16 myń jolaýshyǵa jetetindigi týraly aıtyldy. Qaıta jańǵyrtý kezinde platforma uzarady, eskalator men lıft ornatylyp, jer asty ótpeli jolynyń, kópdeńgeıli parkıng ótýdiń kólemi keńeıedi.
Baqytjan Saǵyntaev múmkindigi shekteýli balalardyń «Meıirim» reabılıtatsııalyq ortalyǵyna bardy. Ortalyq ujymy mamandardyń balalarǵa kórsetetin korrektsııalyq-damytý sabaqtary, psıhologııalyq-pedagogıkalyq kómekteri, emdik deneshynyqtyrý, áleýmettik-eńbek reabılıtatsııasy, mýzykalyq, kórkem, oıyn terapııasy týraly aıtty. Ortalyq tserebraldy sal aýrýyna shaldyqqan, qozǵalý múmkindikteri men damý jaǵynan shektelgen 3 jastan 15 jasqa deıingi balalarǵa ashylǵan.
