Baqytjan Saǵyntaev jańa eńbek mınıstrin vedomstvo ujymyna tanystyrdy
ASTANA. QazAqparat - Búgin Memleket basshysynyń tapsyrmasymen QR Premer-Mınıstri Baqytjan Saǵyntaev jańa mınıstr - Mádına Ábilqasymovany QR Eńbek jáne halyqty áleýmettik qorǵaý mınıstrliginiń ujymyna tanystyrdy, dep habarlaıdy primeminister.kz.
Memleket basshysynyń Jarlyǵymen Tamara Dúısenova QR Eńbek jáne halyqty áleýmettik qorǵaý mınıstri qyzmetinen bosatyldy.
QR Premer-Mınıstri Baqytjan Saǵyntaev Tamara Dúısenovaǵa atqarǵan jumystary úshin alǵys bildirip, onyń vedomstvo qurylymynda qatardaǵy mamannan mınıstr laýazymyna deıin jetkenin jáne memlekettik qyzmettegi merıtokratııa qaǵıdatynyń aıqyn úlgisi ekenin atap ótti. T. Dúısenova halyqty áleýmettik qorǵaý salasynda reformalardy ázirleýge jáne júzege asyrýǵa tikeleı atsalysqan. Baqytjan Saǵyntaev Tamara Dúısenovaǵa qyzmette sáttilik tiledi.
Baqytjan Saǵyntaev jańa mınıstrge jáne mınıstrlik ujymyna Memleket basshysynyń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» Qazaqstan halqyna Joldaýynda, sondaı-aq Úkimettiń keńeıtilgen otyrysynda qoıǵan mindetterin oryndaý boıynsha tapsyrmalar berdi.
Mádına Ábilqasymova 1978 jyly Almaty qalasynda dúnıege kelgen.
1999 jyly Qazaq memlekettik basqarý akademııasyn «halyqaralyq ekonomıkalyq qatynastar» mamandyǵy boıynsha bitirgen. 2002 jyly Kolýmbııa ýnıversıtetin halyqaralyq qatynastar magıstri dárejesimen «ekonomıkalyq saıasatty basqarý» mamandyǵy boıynsha támamdaǵan. 2011 jyly Garvard ýnıversıtetiniń Kennedı atyndaǵy Memlekettik basqarý mektebin «memlekettik basqarý magıstri» mamandyǵy boıynsha aıaqtaǵan.
Túrli jyldary Strategııalyq josparlaý agenttiginiń bas mamany, Ekonomıka jáne bıýdjettik josparlaý mınıstrliginiń strategııalyq josparlaý basqarmasynyń basshysy, «Marketıngtik-taldamalyq zertteýler ortalyǵy» AQ memlekettik saıasatty taldaý departamentiniń dırektory bolyp eńbek etken.
2006 - 2008 jyldary M. Ábilqasymova QR Premer-Mınıstri Keńsesiniń Áleýmettik-ekonomıkalyq bólim meńgerýshisiniń orynbasary bolǵan, odan keıin QR Prezıdenti Ákimshiliginiń Strategııalyq ázirlemeler jáne taldaý ortalyǵy meńgerýshisiniń orynbasary bolyp taǵaıyndalǵan.
2011 jylǵy qyrkúıekten 2013 jylǵy aqpanǵa deıin QR ekonomıkalyq damý jáne saýda vıtse-mınıstri laýazymyn atqarǵan.
2012 jyldan bastap - Dúnıejúzilik banktiń Qazaqstandaǵy basqarýshysynyń orynbasary.
2013 - 2014 jj. - QR ekonomıka jáne bıýdjettik josparlaý vıtse-mınıstri.
2014 jyldyń tamyz aıynan bastap qazirgi tańǵa deıin QR ulttyq ekonomıka vıtse-mınıstri qyzmetin atqarǵan.
