Baqytjan Saǵyntaev Tatarstan Prezıdentimen ınvestıtsııalyq yntymaqtastyq keleshegin talqylady
ASTANA. QazAqparat - Búgin QR Premer-Mınıstri Baqytjan Saǵyntaev «Astana» halyqaralyq qarjy ortalyǵynyń tanystyrylymyna jáne Qazaqstan elordasynyń 20 jyldyǵyn merekelýge qatysý úshin kelgen Tatarstan Respýblıkasynyń Prezıdenti Rýstam Mınnıhanovpen kezdesti. Bul týraly primeminister.kz saıtynda habarlandy.
Kezdesý barysynda saýda-ekonomıkalyq yntymaqtastyqtyń ózekti máseleleri jáne ınvestıtsııalyq ózara is-qımyldy odan ári keńeıtý josparlary, sondaı-aq tranzıttik-kólik salasyndaǵy birlesken jobalardy iske asyrý keleshegi talqylandy.
Budan ózge, kezdesý qatysýshylary bilim berý jáne ónerkásip salalaryndaǵy ózara is-qımyl baǵyttaryn qarady. B. Saǵyntaev Qazaqstanǵa Tatarstannyń tsıfrlyq servıstik qyzmetterdi engizý men aqparattyq tehnologııalardy damytýdaǵy tájirıbesi qyzyǵýshylyq týdyratynyn málimdedi.
Óz kezeginde, Tatarstan Prezıdenti Rýstam Mınnıhanov Qazaqstan men Tatarstannyń ekonomıkanyń túrli salalaryndaǵy tıimdi yntymaqtastyǵynyń mańyzdylyǵyn atap ótti.
