Baqytjan Saǵyntaev Tashkentte TMD úkimetteri basshylary keńesiniń otyrysyna qatysty
Shara qarsańynda, 2 qarasha kúni keshke, Baqytjan Saǵyntaev Ózbekstan Respýblıkasynyń Prezıdenti Shavkat Mırzıeevpen kezdesti. Kezdesý barysynda saýda-ekonomıkalyq yntymaqtastyqty damytý jáne kólik-tranzıttik, aýyl sharýashylyǵy, energetıka salalaryndaǵy birlesken jobalardy iske asyrý máseleleri talqylandy.
Shaǵyn quramdaǵy otyrys aıasynda ekonomıkalyq ózara is-qımyl men TMD-ǵa qatysýshy elderdiń saýda-ekonomıkalyq qarym-qatynasyn nyǵaıtýǵa jaǵdaılar jasaý boıynsha ózekti máseleler talqylandy. Sonymen qatar saýda kedergilerin odan ári azaıtý men saýda men kooperatsııa áleýetin ashýǵa qatysty sharalar qaraldy.
Keńeıtilgen quramda ótken otyrysta úkimettik delegatsııalardyń basshylary TMD erkin saýda aımaǵy týraly kelisimsharttyń iske asyrylý barysyn, munaı-gaz mashınasyn jasaý, jerdi melıoratsııalaý, taýarlardyń kedendik qunyna baqylaý ornatý, halyqaralyq kartelderge ózara tıimdi is-qımyl sharalaryn damytý jáne t. b. máselelerdi qarady. Sondaı-aq, uıymdastyrýshylyq sıpattaǵy birqatar qujattar talqylandy. Budan ózge, TMD úkimetteri basshylary keńesiniń kezekti otyrysyn 2018 jyldyń kókteminde Tájikstan Respýblıkasynda ótkizý týraly sheshim qabyldandy.
QR Premer-Mınıstri Baqytjan Saǵyntaev ÓR Premer-Mınıstri Abdýlla Arıpovpen Qazaqstan men Ózbekstan prezıdentteri arasyndaǵy kelisimderdi iske asyrý máseleleri boıynsha kezdesý ótkizdi. Taraptar ekijaqty yntymaqtastyqty damytý, óńiraralyq ózara is-qımyldy, ásirese shekara mańy aýmaqtarynda kúsheıtý máselelerin talqylady. Taýar aınalymy kólemin ulǵaıtýǵa erekshe kóńil bólindi. Sondaı-aq, mashına jasaý jáne avtomobıl qurastyrý, azamattyq avıatsııa, farmatsevtıka salalarynda ınvestıtsııalyq ózara baılanysty keńeıtý, kólik-tranzıttik ınfraqurylymdy damytý sharalary, sonymen qatar áskerı-tehnıkalyq jáne aeroǵarysh salalaryndaǵy birlesken jumystardyń keleshegi qaraldy.
Tashkenttegi Táýelsiz memleketter dostastyǵynyń úkimetteri basshylarynyń keńesi otyrysynyń qorytyndysy boıynsha birqatar qujattarǵa qol qoıyldy, olardyń ishinde:
- TMD-ǵa qatysýshy memleketterde taýarlardyń kedendik qunyn anyqtaý jáne baqylaýǵa qajetti aqparatpen almasý týraly kelisim;
- TMD aıasynda terrorızmmen jáne ekstremızmniń ózge de kúshteý sharalarymen, sondaı-aq, olardy qarjylandyrýmen kúres salasynda aqparatpen almasý týraly kelisim;
- TMD-ǵa qatysýshy memleketterdiń jerdi melıoratsııalaý salasyndaǵy yntymaqtastyǵynyń tujyrymdamasy jáne ony iske asyrý boıynsha birinshi kezekti sharalardyń jospary;
- TMD-ǵa qatysýshy memleketterdiń munaı-gaz mashınasyn jasaý salasyndaǵy yntymaqtastyǵynyń tujyrymdamasy jáne ony iske asyrý boıynsha birinshi kezekti sharalardyń jospary;
- TMD-ǵa qatysýshy elderde 2020 jylǵy kezeńde halyq sanaǵyn júrgizýge daıarlyq barysy týraly;
- 2020 jylǵa deıin TMD-ǵa qatysýshy elderde medıtsınalyq-áleýmettik kómek kórsetýdi jáne jergilikti shıelenisterge qatysqan soǵys ardagerleri men olardyń otbasy músheleriniń ómir sapasyn arttyrýdy odan ári damytýdyń negizgi baǵyttaryn iske asyrý boıynsha sharalar josparyn 2018 jyly qarjylandyrý týraly.
Budan ózge, TMD-da taýarlardyń shyǵarylǵan elin anyqtaý erejeleri týraly, halyqaralyq avtokólik tasymaldaýshylarynyń kásibı biliktiligi men qosymsha oqytylýyna talaptardyń úılesimdiligi týraly, memleketterdiń úılestirýshilik kólik keńesteri týraly keıbir kelisimderge ózgerister engizildi.
Aıta keteıik, bıyl Qazaqstan men Ózbekstan arasyndaǵy dıplomatııalyq qarym-qatynastyń ornaǵanyna 25 jyl tolady. 2018 jyly Qazaqstanda Ózbekstan jyly ótedi. Eki el arasyndaǵy syrtqy saýda aınalymy 2017 jyldyń segiz aıynda $1,2 mlrd (eksport - $747 mln) qurady, ótken jyldyń osy kezeńindegi ósim kórsetkishi 31% qurady.
