Baqytjan Saǵyntaev sý tasqyny men órtke qarsy shara qabyldamaǵan ákimderdi sókti
ASTANA. QazAqparat - Búgin Úkimet otyrysynda QR Premer-Mınıstri Baqytjan Saǵyntaev sý tasqyny men órtke qarsy naqty sharalar qabyldamaǵan ákimderdi sókti, dep habarlaıdy QazAqparat tilshisi.
Otyrys barysynda birqatar oblystyń ákimi sý tasqyny men órt qaýpiniń aldyn alý baǵytynda óńirlerde atqarylyp jatqan jumystar jaıynda esep bergen bolatyn. Alaıda olardyń baıandamasy Úkimet basshysynyń kóńilinen shyqqan joq.
«Qazirgi ýaqytta qandaı máselelerdi sheshýimiz kerek? «Baıaǵy jartas, sol jartas» degen sóz bar. Sý tasqyny keledi, úıler sýdyń astynda qalady, qys keledi, úıler órtenip jatady. Al bárimizdiń baıandamamyz keremet. Mınıstrler qandaı kemshilikterdiń bar ekendigin aıtty, sol týraly jaýap berý kerek. Ne sebepten qarjylandyrý máselesi sheshilmedi? Nege berilmedi, nege iske qosylmady? Órtke ne sebepti jol berildi? Qandaı tekseris júrgizilip, nedeı sharalar qabyldandy? Ol týraly bir aýyz sóz joq. Aıtatyndaryńyz «bári keremet, bári jaqsy, qatań baqylaýda». Qandaı baqylaýda ekendigin kórip otyrmyz», - dedi Baqytjan Saǵyntaev.
Aıta keterligi, bul másele boıynsha Úkimet otyrysynda QR Іshki ister mınıstri Qalmuhanbet Qasymov, Indýstrııa jáne ınfraqurylymdyq damý mınıstri Jeńis Qasymbek baıandama jasaǵan bolatyn.
