Baqytjan Saǵyntaev SQO-daǵy bilim berý sapasyna qatysty máseleni qozǵady
Sapardyń maqsaty - Prezıdenttiń «Qazaqstannyń úshinshi jańǵyrýy: jahandyq básekege qabilettilik», «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» joldaýlary men «Bes áleýmettik bastamasynyń», sondaı-aq memlekettik jáne salalyq baǵdarlamalardyń óńirde júzege asyrylý barysymen tanysý.
Sapar aıasynda Soltústik-Qazaqstan oblysynyń 2018-2021 jyldarǵa arnalǵan keshendi áleýmettik-ekonomıkalyq damý josparyn júzege asyrý barysy týraly keńes ótkizip, birqatar áleýmettik jáne ónerkásiptik ınfraqurylym nysandaryn aralaý josparlanǵan. Budan ózge, Premer-Mınıstr Qazaqstan men Reseıdiń XV aımaqaralyq yntymaqtastyq forýmyn ótkizýge daıyndyq barysymen tanysady.
Sapar barysynda Baqytjan Saǵyntaev óńirde bilim berý sapasyn arttyrý boıynsha qabyldanyp jatqan sharalarǵa nazar aýdardy. «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» Qazaqstan halqyna joldaýynda Memleket basshysy bilim berý baǵdarlamalarynyń negizgi basymdyǵy ózgeristerge únemi beıim bolý jáne jańa bilimdi meńgerý qabiletin damytý bolýǵa tıis ekenin atap ótti. Elimizdiń barlyq óńirlerinde oqýshylar saraılarynyń bazasynda kompıýterlerdi, zerthanalardy, 3D-prınterlerdi qosa alǵanda, barlyq qajetti ınfraqurylymmen bıznes-ınkýbatorlar men balalar tehnoparkteriniń jelisin qurý tapsyrylǵan. Bul jas býyndy ǵylymı-zertteýshilik jáne ónerkásiptik-tehnologııalyq ortaǵa sátti yqpaldastyrýǵa jol ashady.
Premer-Mınıstr Petropavl qalasynda jańadan salynyp jatqan Oqýshylar saraıyna bardy. Nysan aldyńǵy qatarly zamanaýı tehnologııalarmen jaraqtandyrylady. Soltústik Qazaqstan oblysy ákiminiń orynbasary A. Fedıaevtiń aıtýynsha, nysanda AT-ındýstrııasynyń perspektıvaly baǵyttary men STEM-bilim berý júıesimen joǵar tehnologııaly kabınetter bazasy men zerthana keshenderin qurý kózdelgen.
Oqýshylar saraıynda baǵdarlamalaý jáne grafıkalyq dızaın zerthanalary, vırtýaldy jáne tolyqtyrylǵan shynaıylyq, TecQuipment (Ulybrıtanııa) ınjenerlik ǵylymdary, robotty tehnıka qurylymdaý (AQSh), anımatsııalyq stýdııa, golografııa, karkasty-vakýýmdy kınoteatr, Lexsolar (Germanııa) elektromobılderi, Thespian (Ulybrıtanııa) gýmanoıdty roboty men adamnan aýmaıtyn NAO (Frantsııa) robottary jáne basqa da tehnologııalar bolady.
M. Qozybaev atyndaǵy Soltústik Qazaqstan memlekettik ýnıversıtetinde Baqytjan Saǵyntaev stýdentter jataqhanasynyń bir korpýsyn aralady, onda Prezıdenttiń Bes áleýmettik bastamasynyń oryndalýymen tanysty. Jataqhana bólmelerin aralaý kezinde ýnıversıtet rektory S. Ómirbaev búgingi tańda JOO-da 5531 stýdent bilim alyp jatqanyn, olarǵa arnalǵan 4 jataqhananyń bar ekenin málimdedi. Sonymen qatar, jyl saıynǵy qabyldaý kóleminiń artýy men ýnıversıtette bilim alýshylardyń sanyn eskergende, 2018/19 oqý jylynda jataqhanaǵa degen qajettilik 3150-den astam oryndy quraıdy. SQO ákimdiginiń derekterine sáıkes, 2018 jyly óńirde bilim berý júıesin qarjylandyrýǵa 55,3 mlrd tg qarastyrylǵan. 31,2 mlrd tg 01.08.2018 j. jospar kezinde ıgerý 100% qurady.
Aıta ketý kerek, joǵary bilim berýdiń qoljetimdiligi men sapasyn arttyrý aıasynda jergilikti bıýdjetten jergilikti JOO-ǵa oqýǵa túsýge nıet bildirýshilerge 75 grant bólindi.
Buǵan qosa, Premer-Mınıstr Baqytjan Saǵyntaev Ýnıversaldy tennıs ortalyǵyna bardy. Jańa áleýmettik nysan 4 jabyq jáne 3 ashyq tennıs alańynan turady. Sonymen qatar, eki jabyq alań basketbol men voleıbolǵa arnalǵan ámbebap sport alańyna túrlenedi. Kórermender trıbýnasy 1000-nan astam adamǵa arnalǵan. Qabyldanyp jatqan sharalar óńir halqy arasynda sport pen salaýatty ómir saltyn nasıhattaýǵa jol ashady.
Esterińizge sala keteıik, Premer-Mınıstr Memleket basshysynyń tapsyrmasymen elimizdiń óńirlerin jumys saparymen aralap júr. Buǵan deıin Baqytjan Saǵyntaev jumys saparymen Atyraý, Qaraǵandy, Qostanaı, Qyzylorda, Mańǵystaý, Ońtústik Qazaqstan, Aqmola, Batys Qazaqstan jáne Túrkistan, Aqtóbe oblystarynda bolyp qaıtty.
