Baqytjan Saǵyntaev shaǵynaýdandardaǵy jol qurylysyn tekserdi
Qalaǵa qosylǵan eldi mekenderde kezinde jol-kólik jáne ınjenerlik ınfraqurylymdar múldem bolmaǵan, sondyqtan qala shetindegi shaǵyn aýdandarǵa jol salý jobasy «Jańa Almaty» keshendi jospary aıasynda júzege asyrylyp jatyr.
Qala ákimi Baqytjan Saǵyntaevtyń tapsyrmasymen «Ójet» shaǵyn aýdanynda uzyndyǵy 11,3 shaqyrym bolatyn 87 kóshege, al «Shańyraq-5» shaǵyn aýdanyndaǵy uzyndyǵy 6,6 shaqyrym 29 kóshege alǵash ret jol salynbaqshy.
Qazirgi kezde Ójet shaǵyn aýdanyndaǵy 15 kóshede jol-qurylys jumystary júrip jatyr. Bul iske 50-ge jýyq arnaıy tehnıka birligi men 70 jumysshy jumyldyrylǵan.
«Shańyraq-5» shaǵyn aýdanyndaǵy 18 kóshede 26 arnaıy tehnıka birligi men 50 jumysshy jol salýmen aınalysýda.
Baqytjan Saǵyntaev jumys sapary barysynda qurylystyń qarqynyn, jumyldyrylǵan jumysshy kúshi men tehnıka sanyn tekserdi, sonymen qatar qoldanylatyn materıaldardyń sapasyna nazar aýdardy.
Merdigerler atalǵan shaǵynaýdandardaǵy joldarǵa asfalt tóseý jumysyn merziminen buryn aıaqtaýdy kózdep otyr.
«Ójet» shaǵynaýdanynyń turǵyndary Almaty ákimdigine alǵysyn jetkizdi.
Sonymen qatar, «Jańa Almaty» keshendi damý jospary aıasynda alǵash ret kóshe jaryǵy ornatyldy.
Qala ákimimen áńgime barysynda turǵyndar balalar alańyn salýǵa jáne qoǵamdyq qaýipsizdikti qamtamasyz etý sharalaryn kúsheıtýge tilek bildirdi.
Megapolıs basshysy «Bıýdjetke qatysý» jobasy aıasynda birneshe oıyn alańyn salý josparlanǵanyn aıtty.
Budan ózge, polıtsııa departamenti «Ójet» shaǵyn aýdanynda polıtsııanyń modýldi postyn ashady jáne vıdeobaqylaý kameralaryn ornatý múmkindigi qarastyrylady.
«Shańyraq-5» shaǵyn aýdanynyń turǵyndary Baqytjan Saǵyntaevtan beınebaqylaý kameralaryn ornatýdy jáne elektr energııasynyń jıi sónýine jol bermeý ári tarıfterdi jalpyqalalyqpen teńestirý úshin elektr jelilerin qala balansyna berý protsesin aıaqtaýdy surady.
Ákim energotıimdilik jáne ınfraqurylymdyq damý basqarmasyna kóterilgen máselelerdi sheshý joldaryn qarastyrýdy tapsyrdy.
Turǵyndardyń ótinishi boıynsha jaqyn ornalasqan qaraǵaıly baqta balalar alańdaryn jasaý qarastyrylady.
Áleýmettik ınfraqurylym jónindegi suraqtarǵa jaýap bere kelip, qala ákimi kórshiles «Saıaly-2» shaǵyn aýdanynda 550 oryndy mektep salýdyń josparlanǵanyn eske saldy.
Qala ákimi uzyndyǵy 1,6 shaqyrym bolatyn Qurmanǵazy, Muqanov, Naýryzbaı batyr kóshesindegi joldardy ortasha jóndeý jumysynyń barysyn tekserdi.
Jumysty aıaqtaý 2021 jyldyń maýsymyna josparlanǵan.
Baqytjan Saǵyntaev jumys saparynyń qorytyndysy boıynsha jol jóndeý jumysynyń sapasyn turaqty baqylaýda ustaýdy jáne jobalardy belgilengen merzimde aıaqtaýdy tapsyrdy.
