Baqytjan Saǵyntaev Semeıde medıtsınalyq kómek sapasymen tanysty
ASTANA. QazAqparat - Búgin Shyǵys Qazaqstan oblysyna jumys sapary aıasynda QR Premer-Mınıstri Baqytjan Saǵyntaev Semeı qalasyndaǵy jedel medıtsınalyq járdem aýrýhanasyn aralaý kezinde densaýlyq saqtaý sapasyn arttyrý boıynsha óńirde atqarylyp jatqan jumystarmen tanysty, dep habarlaıdy primeminister.kz saıty.
Aýrýhanany aralaý barysynda Baqytjan Saǵyntaev medıtsınalyq qyzmetterdi usyný sapasymen tanysty. Ota jasaý bólimine, sondaı-aq aýrýlardy qabyldaıtyn bólimge bardy, oblystyq densaýlyq saqtaý basqarmasynyń basshysy M. Shoranovtyń aıtýynsha, munda jańa Triaqe júıesi engizilgen. Bul jańashyldyq medıtsınalyq kómek kórsetý merzimderin jyldamdatýǵa baǵyttalǵan. Aýrýlardy qabyldaý bóliminde kópdeńgeıli júıe engizilgen, ıaǵnı onyń túsine baılanysty dárigerler men medıtsınalyq qyzmetkerler patsıentterdiń aýrýlarynyń asqyný dárejesin kóre alady. Bul birinshi kezekte jedel kómekti qajet etetin patsıentterge qajetti medıtsınalyq kómekti kórsetýge múmkinik beredi. Aýrýhanada sonymen qatar zamanaýı medıtsınalyq jabdyqtar ornatylǵan. Bıylǵy 8 aıdyń ishinde ǵana 9 myńǵa jýyq naýqasqa qyzmet kórsetilgen.
Triage-júıe - patsıentterdi birinshi kezektegi jáne bir rettik medıtsınalyq kómekterge degen muqtajdyǵyna oraı toptarǵa bólý. Patsıentter munda júginý túri men jaı-kúıiniń aýyr-jeńildigine qaraı úsh jikke bólinedi: shuǵyl jedel kómek kórsetiletinderden aýrýhanaǵa josparly túrde jatqyzylatyndarǵa deıin. Bul densaýlyǵy kúrt kúrdeli jaǵdaılarǵa ushyraǵan patsıentterge birden shuǵyl medıtsınalyq kómek kórsetýge múmkindik beredi, ıaǵnı birden reanımatsııalyq em sharalaryn qolǵa alýǵa, júrek defıbrıllıatsııasyn jasaýǵa t.b. bolady. Emdelýshilerdi bulaı jikteý nysandaǵy sanıtarlyq-epıdemıologııalyq jaǵdaıdy saqtaý jáne túrli juqpaly aýrýlardyń taralýynyń aldyn alý úshin asa mańyzdy.
Premer-Mınıstrge munda óńirde «Densaýlyq» memlekettik baǵdarlamasynyń iske asyrylý barysy jáne 2017-2019 jyldarǵa arnalǵan Shyǵys Qazaqstan oblysynyń densaýlyq saqtaý júıesiniń tıimdiligin arttyrýdyń keshendi josparynyń iske asyrylýy týraly baıandady. Atap aıtqanda, oblysta densaýlyq saqtaý salasyn tsıfrlandyrý, salany retteýsizdendirý, MJÁ jáne jekemenshik qyzmet kórsetý sektoryn damytý, sonymen qatar, medıtsınalyq qyzmet kórsetý sapasy halyqtyń áleýmettik kóńil-kúıiniń mańyzdy komponenti retinde aıqyndalǵan Memleket basshysynyń Qazaqstan halqyna arnaǵan «Qazaqstandyqtardyń ál-aýqatynyń ósýi: tabys pen turmys sapasyn arttyrý» Joldaýynda qoıylǵan mindetterdi oryndaý jospary týraly baıandaldy.
Qazir oblystaǵy memlekettik medıtsınalyq mekemelerde 4 myńnan astam dáriger men 11,5 myńǵa jýyq orta medıtsınalyq qyzmetker bar. Óńirdi bilikti kadrlarmen qamtamasyz etý maqsatynda medıtsınalyq joǵary oqý oryndarynyń túlekterine áleýmettik qoldaý sharalary kórsetiledi. Atap aıtqanda, aýyldyq jerge kelgen jas mamandarǵa áleýmettik qoldaý bildiriledi. Mysaly, «Dıplommen - aýylǵa» baǵdarlamasy boıynsha 40 mamanǵa bir rettik kóterme aqy jáne 12 dárigerge turǵyn úı alý úshin jeńildikpen nesıe berilgen. «Jumyspen qamtýdyń jol kartasy - 2020» baǵdarlamasy aıasynda dárigerler Óskemende baspanamen qamtylǵan.
ShQO Densaýlyq saqtaý basqarmasynyń basshysy M. Shoranov patsıentterge joǵary tehnologııaly medıtsınalyq kómek kórsetý úshin oblysta Robottandyrylǵan hırýrgııa ortalyǵy, Transplantologııa ortalyǵy, Insýlt ortalyǵy jumys isteıtinin aıtty. Budan ózge, neırohırýrgııa jáne gematologııa salasyndaǵy jobalardy iske asyrý kózdelgen. Jalpy, ákimdiktiń málimetteri boıynsha, 2019 jyldyń sońyna qaraı basymdyqty baǵyttar boıynsha oblystaǵy barlyq medıtsınalyq uıymdar álemdik deńgeıdegi zamanaýı medıtsınalyq jabdyqtarmen jaraqtalatyn bolady.
Densaýlyq saqtaý júıesin tsıfrlandyrý aıasynda 100% memlekettik jáne 97,4% derbes medıtsınalyq uıymdarda medıtsınalyq aqparattyq júıeler engizilgen. Qyzmetkerlerdiń 100% Densaýlyq saqtaý mınıstrliginiń aqparattyq júıelerimen jumys isteýge oqytylǵan. Jańa mobıldik qosymshalardy patsıentterge túsindirý jáne qoldaný boıynsha kómek kórsetý úshin medıtsınalyq uıymdardyń tirkeý bólimderinde tsıfrlyq saýattylyq posttary qurylǵan. Jyl sońyna deıin qalalyq medıtsınalyq uıymdardyń 30%-yn jáne aýyldyq medıtsınalyq uıymdardyń 15%-yn mobıldik qosymshalarmen qamtý josparlanǵan. Al 1 shildeden bastap medıtsınalyq qujattamany qaǵazsyz júrgizýge kóshý iske asyrylady.
Qazirgi kezde ShQO densaýlyq saqtaý salasynda MJÁ qaǵıdaty boıynsha alty joba iske asyrylyp jatqanyn aıta ketken jón. Sonymen qatar, jekemenshik medıtsınany damytýǵa kóbirek kóńil bólinedi. Máselen, oblystaǵy kepildendirilgen tegin medıtsınalyq kómek kólemin kórsetetin medıtsınalyq uıymdardyń 47%-y jekemenshik bolyp tabylady.
