Baqytjan Saǵyntaev Prezıdentten kómek surady
ALMATY. QazAqparat - Almaty ákimi Baqytjan Saǵyntaev Memleket basshysy Qasym-Jomart Toqaevtan 124 jer ýchaskesin satyp alýǵa 9,4 mlrd teńge bólýin tapsyrýdy surady, dep habarlaıdy QazAqparat tilshisi.
«Qazirgi ýaqytta Úkimettiń qoldaýynyń arqasynda qalada 3 jol aıryǵynyń qurylysy jalǵasýda (Seıfýllın dańǵyly - Jansúgirova kóshesi, Rysqulov dańǵyly - Emtsova kóshesi, Buqtyrma kóshesi – Qulja tas joly) jáne 3 kósheni uzartý jumystary júrip jatyr. Bizge 2020 jylǵa arnalǵan respýblıkalyq bıýdjetten 28,6 mlrd teńge qajet. Úkimet 2020 jylǵa jol aıyryǵynyń qurylysy men kósheni uzartý jumystaryna 17,2 mlrd teńge bólip otyr. Sonymen qatar, jol túsetin jer ýchaskesin satyp alý máselelerin aldyn-ala sheshýge tıispiz.
Osyǵan baılanysty, sizden Qarjy mınıstrligine 2020-2021 jyldarǵa arnalǵan bıýdjettik tsıkldy naqtylaý kezinde 124 jer ýchaskesin satyp alýǵa 9,4 mlrd teńge bólýin tapsyrýdy suraımyn»,- dedi Almaty ákimi Baqytjan Saǵyntaev.
Onyń aıtýynsha, eger 2021 jylǵa deıin qaladaǵy tıisti jerdi satyp alynbasa, onda kóshelerdegi qurylys jumystary taǵy da toqtap qalýy múmkin.
Óz kezeginde, QR Indýstrııa jáne ınfraqurylymdyq damý mınıstri Beıbit Atamqulov bıyl jol-kólik ınfraqurylymyn damytýǵa 24 mıllıard teńge qarastyrlǵanyn , onyń 11 mıllıardy joldardy qalpyna keltirýge bólingenin atap ótti.
Mınıstrdiń aıtýynsha, Almatyda metro stansasynyń qurylysy jalǵasýda, jolaýshylar kóligi jańartylyp jatyr. Halyqaralyq avıatsııalyq habty damytý josparda. Jol jelisiniń uzyndyǵy - 3023 shaqyrymdy quraıdy. Onyń 75% -y jaqsy jáne qanaǵattanarlyq jaǵdaıda.
«Bıyl biz Rysqulov pen Qulja tas jolyndaǵy jol aıryǵynyń qurylysyn aıaqtaýdy josparlap otyrmyz. Tórt jol jobasy boıynsha 256 jer ýchaskesin satyp alýǵa 12,5 mlrd teńge bólindi. 2020 jylǵa arnalǵan respýblıkalyq bıýdjette 12,7 mlrd teńge qarastyrylǵan, onyń 9,5 mlrd teńgesi avtokólik joldaryn salý men qaıta qalpyna keltirýge jumsalady. Al jer ýchaskelerin satyp alý úshin 3,1 mlrd teńge qarastyrylǵan. Metro qurylysy jalǵasýda. Oǵan respýblıkalyq bıýdjetten 17,4 mlrd teńge bólindi, onyń ishinde 12 mlrd teńgesi Saryarqa men Dostyq stansasynyń qurylysyna baǵyttalǵan jáne 5,4 mlrd teńge vagondarǵa bólindi. Qurylys jumystary 2021 jyly aıaqtalady dep josparlanýda», - dedi Beıbit Atamqulov.
