Baqytjan Saǵyntaev Oralda turǵyn úı baǵdarlamalarynyń iske asyrylýymen tanysty
Sonymen qatar, B. Saǵyntaev mamandandyrylǵan HQKO jumys zaldaryn aralap, «bir tereze» qaǵıdaty boıynsha memlekettik qyzmetterdi berý protsesin avtomattandyrý sharalarymen tanysty.
Salynyp jatqan kóppáterli turǵyn úıdi tekserý barysynda Premer-Mınıstrge nysan osy jyldyń shilde aıynda paıdalanýǵa beriletini aıtyldy. Oral qalasynyń ákimi M. Muqaev Memleket basshysynyń jarııalanǵan memlekettik turǵyn úı baǵdarlamalary tolyq kólemde iske asyrylyp jatqanyn atap ótti. 2015-2017 jyldary turǵyn úıdi paıdalanýǵa berý kólemi 159%-ǵa artty. Ákimdiktiń málimetteri boıynsha, ótken jyly óńirde 3 828 turǵyn úı salyndy, bul 2016 jylmen salystyrǵanda 38,6% artyq. 2017 jyly bastalǵan «Nurly jer» memlekettik baǵdarlamasy aıasynda jalpy somasy 9 mlrd teńgege 7 turǵyn úı (1106 páter) paıdalanýǵa berildi. Osy jyldyń 1 shildesinde 2 234 turǵyn úı (234,9 myń sharshy metr turǵyn úı) paıdalanýǵa berildi, bul 2017 jyldyń osyndaı kezeńimen salystyrǵanda 115% teń. Bıyl barlyǵy 415,7 myń sharshy metr paıdalanýǵa beriledi, bul shamamen 3,8 myń turǵyn úı.
«2018 jyly qurylys salasyna 13 mlrd teńge bólindi. Búgingi tańda 43 turǵyn úıdiń (6 400 páter) qurylys jumystary júrgizilip jatyr: memlekettik baǵdarlamalar aıasynda - 3 200 páterge arnalǵan 21 úı, memlekettik-jekeshelik áriptestik aıasynda - 1 400 páterge arnalǵan 10 kópqabatty turǵyn úı, jeke ınvestıtsııalar qarajatynyń esebinen - 1 600 páterge arnalǵan 12 kópqabatty turǵyn úı. Páterlerdiń jalpy aýdany 80,5 myń m²», - dedi Oral qalasynyń ákimi M. Muqaev.
Sonymen qatar, «7-20-25» jańa turǵyn úı baǵdarlamasy aıasynda jáne jeke ınvestıtsııalar esebinen oblys ortalyǵynyń tóńireginde jalpy aýdany 425 gektar bolatyn «Aqjaıyq» jańa shaǵyn aýdanyn ıgerý bastaldy. Munda 150 kóp qabatty turǵyn úı salý josparlanyp otyr.
Budan ózge, óńirde memlekettik-jekeshelik áriptestik qaǵıdattaryna sáıkes, buzylǵan apatty jáne eski úılerdiń ornyna jańa úıler salynýda. Osylaısha, 2017 jyly Oral qalasynda 7 apatty úı qulatylyp, olardyń ornynda jańa ǵımarattar salynyp jatyr. Bıyl apatty dep tanylǵan 13 úı qulatylady.
Memlekettik baǵdarlamalardan ózge, Oralda jeke kópqabatty turǵyn úıler qurylysy qarqyndy júrip jatyr. Qala ákimdiginiń málimetinshe, tek sońǵy úsh jyldyń ózinde ǵana jalpy aýmaǵy 250 myń sharshy metr bolatyn, 4 500 páterden turatyn 35 kópqabatty úı salynǵan. Qazirgi kezde jeke ınvestorlar jalpy aýmaǵy 80,5 myń sharshy metrlik 12 turǵyn úı (1 600 páter) qurylysyn júrgizip jatyr.
Prezıdenttiń Bes áleýmettik bastamasynyń aıasynda sonymen qatar qaladaǵy oqý oryndarynyń janynan stýdentterge arnalǵan 6 jataqhanany salý josparlanyp otyr. Osylaısha, 1 650 stýdent turǵyn jaımen qamtylmaq. Qazirgi kezde jer telimderi bólingen, jobalaý jumystary atqarylýda.
2017 jyly Qazaqstanda rekordty turǵyn úıler sany 11 mln sharshy metr úı paıdalanýǵa berilgen. Osylaısha, «Nurly jer» baǵdarlamasynyń arqasynda 100 myńnan astam adam jańa baspanaǵa ıe boldy. Bıyl 12 mln sharshy metrden astam, ıaǵnı 103 myńnan artyq turǵyn úı salý mindeti tur.
Jumys saparynyń jalǵasy retinde Premer-Mınıstr B. Saǵyntaev mamandandyrylǵan jańa Halyqqa qyzmet kórsetý ortalyǵyna bardy, onda «bir tereze» qaǵıdaty boıynsha memlekettik qyzmetterdi kórsetý ádisterimen tanysty. Mamandandyrylǵan HQKO dırektory M. Basarov aıtyp ótkendeı, jumys istegen 2 aıdyń ishinde ortalyq qyzmetkerleri 15 myń túrli qyzmetterdi kórsetken.
«Qala turǵyndary qyzmetterdi alýdyń qolaıly formatyna kóshti. Kólikti qaıta tirkeý men júrgizýshi kýálikterin aýystyrýdy olar onlaın-rejimde jasaı alady. Buryn atalǵan qyzmetterdi alý ýaqyty shamamen 6 saǵat bolatyn, qazir ortalyqtyń jańa múmkindikteriniń arqasynda kólik ıeleri oǵan shamamen 90 mınýt ýaqyttaryn jumsaıdy. Kún saıyn mamandandyrylǵan HQKO-da orta eseppen 350-370 qyzmet kórsetiledi. Mamandandyrylǵan HQKO-da jyl saıyn 70 myńǵa jýyq avtokólik ıelerine qyzmet kórsetiledi dep josparlanýda», - dedi M. Basarov.
