Baqytjan Saǵyntaev nemis sarapshylarymen birge qosarly bilim berý júıesin talqylady
ASTANA. QazAqparat - Búgin Úkimet úıinde Premer-Mınıstr Baqytjan Saǵyntaev Germanııadan kelgen sarapshylarmen kezdesý ótkizdi, dep habarlaıdy
Sarapshylardyń qatarynda sheteldik ınvestorlar keńesiniń jumys tobynyń teń tóraǵasy, Qazaqstan, Qyrǵyzstan, Tájikstan respýblıkalaryndaǵy KNAÝF kompanııasynyń marketıng jáne ótkizý jónindegi dırektory D. Propp, Ortalyq Azııadaǵy Germanııa ekonomıkasy tóraǵalyǵynyń basshysy, QR-daǵy Germanııa ekonomıkasy odaǵynyń tóraǵasy R. Braıtner bar.
Kezdesý barysynda kadrlardy daıyndaý men qaıta daıarlaýdyń tıimdiligi joǵary básekege qabiletti júıesin odan ári jetildirý, qosarly bilim berýdi is júzinde engizý, óndiristegi jetekshilerdiń biliktiligin arttyrý jáne jalpy Qazaqstandaǵy kásiptik bilim berý júıesin jańǵyrtý arqyly Qazaqstandaǵy tehnıkalyq jáne kásiptik bilim berýdi damytý máseleleri talqylandy.
Sheteldik sarapshylar Germanııadaǵy kásiptik bilim berý salasyndaǵy tájirıbelerimen bólisti. Atap aıtqanda, Bonn qalasynyń Kásiptik bilim jáne oqytý federaldyq ınstıtýtynyń ǵylymı qyzmetkeri H. L. Kress qosarly bilim berýdiń artyqtylyqtary, ony elimizdiń ulttyq ekonomıkasyna engizý men onyń úlesiniń tetikteri týraly aıtyp berdi.
Bilim jáne ǵylym mınıstri E. Saǵadıev, Eńbek jáne halyqty áleýmettik qorǵaý mınıstri M. Ábilqasymova, Investıtsııalar jáne damý mınıstri J. Qasymbek, ulttyq ekonomıka birinshi vıtse-mınıstri R. Dálenov pen «Atameken» QR ulttyq kásipkerler palatasy basqarma tóraǵasynyń orynbasary O. Ordabaev atynan qazaqstandyq qatysýshylar Qazaqstanda qosarly bilim berýdi engizýdiń qazirgi jaǵdaıy týraly aıtyp, kásiptik bilim berýdi jańǵyrtý jáne joǵary bilikti mamandardy daıarlaýdyń jańa deńgeıine kóshýdiń mańyzdylyǵy men ózektiligine toqtalyp ótti.
