Baqytjan Saǵyntaev: Naýryzbaı aýdanynda aýyzsý máselesi eki jylda sheshiledi
«Men aptasyna bir ret «Almaty-live» arqyly halyqpen tikeleı baılanysqa shyǵyp turamyn. Sol kezde qoıylatyn suraqtyń 50 paıyzy Alataý men Naýryzbaı aýdandarynan kelip túsedi. Bular Almaty oblysynan qala quramyna keıin qosylǵan aýdandar. Bári ınfraqurylymnan beıhabar qalǵan. Ne joly, ne joly, kárizi, jaryǵy kesheýildep, qalyp ketken. Endi Almaty qalasyna qosylǵannan keıin «Biz de qalanyń ortalyǵyndaǵy turǵyndar paıdalanyp otyrǵan qyzmetterdi paıdalanýǵa qaqylymyz, ákimshilik sony bizge jasap bersin» deıdi. Durys talap. Ol úshin biz ne istep jatyrmyz? Birinshiden, Jańa Almatynyń keshendi damý jospary bar», - dedi qala ákimi Ortalyq kommýnıkatsııalar qyzmetinde ótken brıfıngide.
Sondaı-aq, ol jaz shyqsa, sýdy «vodovozben» tasıtyn eldi mekenderdiń máselesine toqtaldy.
«Mysaly Naýryzbaı aýdanynda sý jetpeıdi. Jazdyń keıbir kúnderi «vodovozben» sý ákeledi. Qarańyz, HHІ ǵasyr, «vodovozben» sý tasımyz. Nege? Sýdyń kólemi jetpeıdi. Óıtkeni taý jaqtan ákeletin sý qondyrǵysynyń qýaty tómen. Halyq sany ósip jatyr. Sý keletin qubyrdyń ózi kishkene. Al jazda jer úıde turǵan soń, árqaısynyń aýlasynda baqsha bar. Ony kútýge de sý kerek. Jazda sý deńgeıi osy sebepti túsedi», - dedi ákim.
Onyń aıtýynsha, atalmysh aýdannyń halqy taý ózenderiniń sýyn tutynyp otyrǵandyqtan, jańbyr jaýǵan saıyn sý sapasy nasharlaıtynyn aıtady.
«Ekinshiden, jańbyr jaýsa, Qarǵaly ózeniniń sýy laılanady. ıAǵnı, súzgi joq. Sol sebepti biz Naýryzbaı aýdanynda eki jumysty qatar bastadyq. Kelesi jyly Aqjardaǵy problemany sheshemiz. Endi joǵary jaqtan sý ákelý máselesi bar. Qazirgi súzginiń kúshi jetpegendikten, Aqsaı shatqalynda salynyp jatqan plotınadan, 3,5 shaqyrym jerden úlken dıametrli qubyrmen sý tartyp jatyrmyz. Keleshekte ol mańda úlken súzgi men sý jınaıtyn keshen salýymyz kerek. Jobasyn Úkimet qoldap, kelesi jyldyń bıýdjetine qosty. Kelesi jyly úlken qurylys bastalady.
Eki jyldyń ishinde tek Naýryzbaı aýdanyn ǵana emes, Almaty oblysynyń Qaskeleń aýdanyndaǵy qosymsha bes eldi mekenge sý beretin múmkindik alamyz. Sondaı-aq, Qarǵalynyń Quramys jaǵyndaǵy arnadan sý alatyn sol tóńirektegi 50 myńnan astam massıv kóktemde sý alatyn bolady», - dedi shahar basshysy.
Baqytjan Saǵyntaev bul aýdandarda jaryq jıi óshpes úshin búkil transformatorlardy memleket menshigine qaıtarý bastalǵanyn atady.
«Jaryqtyń jıi óshetini týraly aıtsaq, kezinde bul aýyldy eldi mekender bolǵan. Almaty oblysyna qaraǵan kezde elektrmen jabdyqtaý isi túgel jeke qoldarǵa ótip ketken. Olar óz tarıfterin qoıady, biraq jóndeý jumystaryn júrgizbeıdi. 2019 jyly qalanyń quramyna ótkende halyq ol problemasyn aıtty. Qazir sonyń bárin memleketke qaıtaryp jatyrmyz. Búgingi tańda sý, jaryq, káriz jelisi boıynsha 1000-ǵa jýyq nysandy memleketke qaıtaryp, keıin monopolıst kompanııalarǵa ótkizip jatyrmyz. Ol da ońaı sharýa emes. Bir ǵana nysandy memleket menshigine sot arqyly qaıtarý úshin 6 aı ketedi. Bolashaqta ıesiz nysannyń bárin qabyldap alamyz», - dedi Almaty ákimi.