Baqytjan Saǵyntaev muǵalimderdiń gazetke májbúrlep jazylýyna qatysty pikir bildirdi
ASTANA. QazAqparat - Mektep muǵalimderiniń gazet-jýrnaldarǵa jazylýy erikti túrde júzege asyrylýy tıis. Bul týraly QR Premer-Mınıstri Baqytjan Saǵyntaevtyń Májilis depýtattarynyń resmı saýalyna berilgen jaýabynda aıtylǵan, dep habarlaıdy QazAqparat tilshisi.
«Buqaralyq aqparat quraldary týraly» Zańnyń 14 babyna sáıkes buqaralyq aqparat quraldarynyń ónimderin taratý menshik ıesiniń sheshimimen nemese redaktsııanyń, basylymnyń, sonymen qatar uıymdardyń nemese azamattardyń kelisimsharty ne basqa da zańdy negizder arqyly júzege asyrylady», - dep atap ótedi Úkimet basshysy.
Premer-Mınıstrdiń jaýabynda kelisimshart jasaý mindeti Kodekste, zańnamalyq aktilerde nemese erikti túrde qabyldanǵan mindettemede kórsetiletin jaǵdaıdy qospaǵanda májbúrli túrde kelisimshart jasaýǵa jol berilmeıdi.
«Osylaısha, uıym qyzmetkerleri, onyń ishinde mektep muǵalimderine merzimdi jýrnaldar men gazetterge jazylýdy rásimdeý erikti negizde júzege asyrylýy tıis», - dedi Baqytjan Saǵyntaev.
Aıta keteıik, buǵan deıin muǵalimderdi gazet-jýrnaldarǵa májbúrli túrde jazdyrý tyıylmaı turǵanyna alńdaýshylyq tanytqan Májilistiń bir top depýtaty Úkimet basshysynyń atyna arnaıy saýal joldaǵan bolatyn. Onda mektep muǵalimderine pedagogıkalyq qyzmetterine esh qatysy joq 2-3 basylymdy májbúrli túrde jazdyratyndyǵy aıtylǵan.
