Baqytjan Saǵyntaev medıtsına qyzmetkerlerin kásibı merekesimen quttyqtady
ALMATY. QazAqparat - Búgin Almaty ákimi Baqytjan Saǵyntaev Medıtsına qyzmetkeri kúnimen quttyqtaý úshin qalanyń medıtsına qaýymdastyǵymen onlaın-kezdesý ótkizdi, dep habarlaıdy QazAqparat tilshisi.
Qala ákimi dárigerlerge jáne megapolıstiń barlyq medıtsına qyzmetkerlerine alǵysyn jetkizdi.
«Gıppokrat antyna adal aq halatty abzal jandar, Sizder ýaqyt synyna tótep bere bildińizder. Koronavırýspen kúreste sizderdiń janqııarlyq eńbekterińiz úshin barsha almatylyqtardyń atynan alǵysymdy bildiremin. Adam saýlyǵynyń qorǵany bolyp júrgen bul mamandyq ıeleriniń bedeline baǵa jetpeıdi», — dedi Baqytjan Saǵyntaev.
Qala ákimi Almatynyń únemi damyǵan medıtsına ortalyǵy bolǵandyǵyn basa kórsetti. Munda ǵylymı-zertteý ınstıtýttary jáne ortalyqtar, medıtsınalyq bilim beretin uıymdar, qalalyq, respýblıkalyq, vedomstvalyq, jeke klınıkalar shoǵyrlanǵan, qalada 30 myńnan astam medıtsına qyzmetkerleri eńbek etedi.
Jyl saıyn bul mereke qarsańynda kásibı baıqaýlar ótkiziledi. Bıyl mamandyqtyń úzdigin anyqtaıtyn bul baıqaý 13 nomınatsııa boıynsha ótti. Atap aıtqanda, úzdik dáriger jáne medbıke, úzdik ınfektsıonıst, emhana men jedel járdemniń úzdik dárigeri, sondaı-aq úzdik júrgizýshi.
«Bul baıqaý Sizderdiń árqaısyńyzdyń eńbekterińizdiń barynsha mańyzdy ekenin kórsetedi. Barlyq jeńimpazdardy quttyqtaımyn», — dedi B. Saǵyntaev jáne koronavırýspen kúreste jankeshtilik tanytyp júrgen eki myńnan astam dárigerdiń eren eńbekterin erekshe baǵalady.
Qalaǵa sińirgen zor eńbekteri úshin bes medıtsına qyzmetkeri «Eńbegi úshin» tósbelgisimen marapattaldy. Birqatar medıtsına qyzmetkerleri qala ákiminiń alǵys hattaryn ıelendi.
«Pandemııa bizdi kóp nársege úıretti. Ortaq kúsh-jigerimizben biz bul qıyndyqty da abyroımen eńseremiz, almatylyqtardyń densaýlyǵyn saqtaý men nyǵaıtý jolynda bárimiz birigip, aıanbaı eńbek etemiz, men buǵan senimdimin», — dep atap ótti Almaty ákimi B. Saǵyntaev.
