Baqytjan Saǵyntaev Qytaımen aradaǵy jobalarǵa qatysty qaýesetke jaýap berdi
«Úkimettiń qaramaǵynda ınvestıtsııalyq klımatty jetildirý jónindegi keńes bar. Oǵan Úkimet múshelerimen birge, sheteldik memleketterdiń elshileri, ınvestorlar qatysyp, ózderiniń usynystaryn jetkizip keledi. Osy keńesterde bizdiń jumystardaǵy kemshilikter aıtylyp jatady, onyń kópshiligi jergilikti jerdegi atqarylyp jatqan sharalarǵa baılanysty. Bul turǵyda Jeńis Mahmuduly (Investıtsııalar jáne damý mınıstri- avt.) jergilikti jerlerde «QazaqInvest» arqyly «bir tereze» qaǵıdaty aıasynda jumystardy jyldamdatyp atqarý qajet», - dep tapsyrdy Úkimet basshysy.
Sonymen qatar Premer-Mınıstr transulttyq kompanııalardy tartý turǵysynda Memleket basshysy tarapynan aıtylǵan eskertýlerdi nazarǵa alý kerektigin atap ótti.
«Qazaqstan-Qytaıdyń birlesken 51 jobasy týraly baıandaldy. Jalpy quny 30 mlrd dollarǵa jýyq tikeleı ınvestıtsııa tartý eskerilgen. Osy jerde bir máselege toqtalǵym keledi, ıaǵnı keı kezderde Qytaımen arada jasalyp jatqan jobalardyń barlyǵy buryn jasalǵan degen qaýeset bolyp jatady. Bul qate pikir, durys emes. Bul turǵyda Elbasynyń qatań talaby bar. Qytaımen birlese jasalǵan árbir joba búgingi halyqaralyq standarttarǵa saı, tek jańa tehnologııalarǵa baılanysty. Buryn paıdalanylǵan eshqandaı eski joba iske asyrylyp jatqan joq. Ony qoǵamǵa «QazaqInvestpen» birge naqty túsindirý qajet», - dedi Baqytjan Saǵyntaev Investıtsııalar jáne damý mınıstrine qaratyp aıtqan sózinde.
Budan buryn habarlanǵandaı, Úkimet otyrysynda mınıstr Jeńis Qasymbek Qytaımen jáne Túrkııamen yntymaqtastyq aıasynda iske asyrylatyn jobalar týraly aıtyp berdi.
«Mınıstrlik «QazaqInvest» AQ-men birlesip jalpy somasy 47,8 mlrd AQSh dollaryn quraıtyn 145 ınvestıtsııalyq jobanyń bazalyq tizimin jasady (35 myń jumys orny). Onyń quramynda Qazaqstan-Qytaı, Qazaqstan-Túrik («Jańa sınergııa») jáne basqa da ınvestıtsııalyq jobalar bar. Qazaqstan-Qytaı yntymaqtastyǵy aıasynda jalpy somasy 27,7 mlrd AQSh dollary bolatyn 51 joba iske asyrylýda. Qazirgi ýaqytta 140 mln dollar bolatyn 4 joba iske qosyldy. Bul baǵdarlama boıynsha 2018 jyly 11 jobanyń qurylysy júredi. Jalpy somasy 363 mln dollar bolatyn 6 jobany iske qosý josparlanyp otyr. Bıyl Qytaı kapıtalynyń qatysýymen 5 jobanyń qurylysy bastalady. Ondaǵy ınvestıtsııa kólemi 623 mln dollardy quraıdy», - dep atap ótti Qasymbek.
