Baqytjan Saǵyntaev qosymsha bilim berý jumystary týraly aıtty
Memleket basshysynyń halyqqa Joldaýynda aıtylǵan tapsyrmalaryna sáıkes Almatyda qalanyń barlyq balalaryna qosymsha bilim berýdi qamtamasyz etý mindeti sheshilip jatyr.
«Qalada 17 qosymsha bilim berý uıymy jumys isteıdi. Onyń ishinde Oqýshylar saraıy, 7 aýdandyq oqýshylar úıi, óner mektebi, 8 mýzykalyq mektep bar, onda 1329 túrli úıirmeler men sektsııalar tegin jumys isteıdi. Sondaı-aq, Almaty qalasy ákiminiń tapsyrmasy boıynsha keler jyly Alataý jáne Naýryzbaı aýdandarynda Oqýshylar saraılarynyń qurylysyn bastaý josparlanǵan. Alataý aýdanynda 5 sporttyq-saýyqtyrý kesheni, tennıs ortalyǵy salynady. Jetisý aýdanynda shyǵys jekpe-jeginiń 4 sport kesheni salyndy, onda balalar tegin jattyǵýlar jasaıdy. Sonymen qatar, memlekettik jekelik áriptestik aıasynda jeke ınvestıtsııalar esebinen 12 mekteptiń sport alańdary qaıta jańǵyrtyldy. Mádenıet salasynda Ortalyqtandyrylǵan kitaphana júıesiniń 10 salalyq kitaphanasy jańardy. Balalardyń qosymsha bilim alýy úshin memlekettik tapsyrysty tek memlekettik uıymdarda ǵana emes, sonymen qatar jekemenshik mektepter de alatyn bolady», - dedi B. Saǵyntaev Akimat Live baǵdarlamasynyń tikeleı efırinde.
Qala turǵyndarynyń suraqtaryna jaýap bere otyryp, qala ákimi Jetisý aýdany Aınabulaq-2 eldi mekenindegi «Shyńǵa Órleý» áleýmettik klýbynyń jobasy týraly aıtty. Bul jobanyń aýqymy keńeıtilip, basqa aýdandarda osyndaı taǵy úsh klýb ashylatyn bolady.
«Osy usynyspen Úkimetke shyǵatyn bolamyz. Basqa da jobalar oıda bar. Mysaly burynǵy pedagog mamandar, zeınetkerler balalardy qosymsha oqytatyn bolady. Jetisý aýdanynda ashylǵan dombyra synyby jetkiliksiz. Osy sııaqty bastamany basqa aýdan ákimderine de tapsyrdym. Konservatorııa túlekterin shaqyryp, kásipkerlerdi tartyp, damytýǵa yntaly bolý kerek. Oqytýshy bop kelgen jas mamandarǵa jaǵdaı jasaý kerek. Tek dombyra ǵana emes, sport alańdary taǵy basqa jobalar kerek. Balalardy bos jiberip koımasaq, jasóspirimder arasynda zańbuzýshylyq tómen bolady», - dedi ákim.