Baqytjan Saǵyntaev koronavırýstan qalaı qorǵanyp júrgenin aıtty
ALMATY. QazAqparat- Almaty qalasynyń ákimi Baqytjan Saǵyntaev onlaın brıfıng barysynda koronavırýs ınfektsııasynan qalaı qorǵanyp júrgenin aıtty, dep habarlaıdy QazAqparat tilshisi.
«Koronavırýstan qorǵaýdyń bir ǵana tásili bar ol- maska. Men maskasyz júrmeımin, ony ózderińiz de kórip otyrsyzdar. Jumys kabınetimde kóp otyrmaımyn. Qaltamda árqashan qosalqy maska júredi. Óıtkeni kóp júrgen kezde, eki-eki jarym saǵatta aýystyryp otyrý kerek. Sol kezde jańasyna aýystyra salamyn. Maskasyz júrgen adamǵa qaltańyzda maskańyz bolsa, maskańyzdy taǵyp alyńyz dep suraımyn. Óıtkeni siz ózińizdi ǵana emes, tóńiregińizde turǵan bizdi oılańyz. Bir-birimizdi qorǵap júrýimiz qajet. Maskasyz júrgen adamǵa artyq maska bolsa, sol kisilerge berip, maskamen júrýin suraımyz», – dedi B. Saǵyntaev.
Sondaı-aq ákim sanıtarlyq talaptaryn saqtaný arqyly keselden qorǵanýǵa bolatynyn eske saldy.
«Sanıtaızermen qoldy jýyp, adam kóp shoǵyrlanǵan jerden aýlaq júrip, araqashyqtyqty saqtap, barlyq talaptardy ustanamyn, «Saqtańsań, saqtaımyn!» degen ǵoı. Aldymen ózińdi qorǵap júrer bolsań, bul keselden qorǵanýǵa bolady», – deıdi Almaty ákimi.
