Baqytjan Saǵyntaev:Koronavırýsqa qarsy vaktsına saldyrýǵa daıynmyn
ALMATY. QazAqparat - Qala ákimi Baqytjan Saǵyntaev tikeleı efırde ótip jatqan turǵyndarmen eseptik kezdesýinde vaktsınatsııanyń birinshi kezeńi týraly aıtty, dep habarlaıdy QazAqparat tilshisi.
Turǵyndardyń suraǵyna jaýap bergen qala ákimi vaktsınatsııanyń qalaı ótip jatqanyna toqtaldy.
«Bizdiń QazCovid-in vaktsınasyn eki myńdaı erikti azamat saldyrdy. Eki ýkolyn da aldy. Eshqandaı qıyn jaǵdaı bolǵan joq. Azdap janama áserler bolǵanymen, basqasynyń bári durys», - dedi Baqytjan Saǵyntaev.
Sonymen qatar, ol kvota boıynsha birinshi jartyjyldyqta Almatyda turǵyndarǵa 150 myń dozanyń qabyldatynyn aıtty.
«Qazir vaktsınalardy ınfektsııalyq statsıonarlardyń, jedel járdemniń dárigerleri, emhanalardyń fıltrli jáne qyzyl aımaqtarda jumys isteıtin dárigerleri men medbıkeleri, sondaı-aq sanıtarlyq-epıdemıologııalyq qyzmettiń qyzmetkerleri alyp jatyr»,- dedi qala ákimi.
2 naýryzdan bastap polıtsııa qyzmetkerleri, áskerı qyzmetkerler, orta mektepterdiń, joǵary oqý oryndarynyń muǵalimderi, medıtsına qyzmetkerleri vaktsınalaýdan ótedi.
Sáýir aıynan bastap mektep-ınternattardyń, mektepke deıingi mekemelerdiń muǵalimderi,oqýshylar jáne sozylmaly aýrýlary bar adamdar egiledi.
Ári qaraı tilek bildirgen azamattar vaktsına ala alady. Vaktsına tegin jáne ázirshe vaktsınalaýǵa aqsha qarastyrylmaǵan.
«Vaktsınany aqyly túrde salý máselesi áli sheshilgen joq, buǵan deıin Prezıdent ekpe memleket esebinen salynatynyn aıtqan, sondyqtan bul máseleni áli de anyqtaımyz. Al ekpe alýǵa kelsek, men de halyqpen birge osy vaktsınany alýǵa daıynmyn»,- dedi Baqytjan Saǵyntaev.
