Baqytjan Saǵyntaev kómir naryǵyndaǵy ahýal týraly aıtty
ASTANA. QazAqparat - QR Premer-Mınıstri Baqytjan Saǵyntaev Májilis depýtattarynyń kómir baǵasyn tómendetýge qatysty resmı saýalyna jaýap berdi, dep habarlaıdy QazAqparat tilshisi.
«Kómir naryǵy zańnamamen rettelmeıtindigi belgili. Baǵa naryq sýbektilerimen derbes belgilenedi. Óz kezeginde, turmystyq kómir baǵasynyń ósýine jol bermeý maqsatynda jedel ári zańnamalyq sharalar qabyldanady. Máselen, ótken jyldyń 26 qarashasynan jergilikti atqarýshy organdar men respýblıka óńirlerinde ornalasqan bólshek naryq sýbektileri arasynda rásimdelgen memorandýmdar aıasynda kommýnaldyq-turmystyq kómirdiń satý baǵasy tómendetildi», - dep atap ótedi B.Saǵyntaev.
Onyń dereginshe, respýblıkanyń temirjol tuıyqtarynda Shubarkól kómiriniń 1 tonnasy ortasha eseppen 15-20, Qarajyra kómiri keminde 6 paıyzǵa arzandaǵan. Óńirlik operatorlar úshin kómirdi kenishten tikeleı satyp alý qarastyrylǵan. Munan bólek, apta saıyn kómir baǵasyna monıtorıng júrgizilip, kómir óndiretin kompanııalardyń, kóterme-bólshek naryq sýbektileriniń derekterine saraptama jasalyp otyrady. Saraptama jumysy olardyń baǵa kelisýine jol bermeý maqsatynda jasalady.
«Ulttyq ekonomıka mınıstrligi respýblıkanyń 10 óńirinde 2017-2018 jylǵy jylý berý maýsymyndaǵy baǵa kelisý faktileri boıynsha bir kómir óndirýshi («Qarajyra» AQ) men kómir jetkizýmen aınalysatyn 49 sýbektini ákimshilik jaýapkershilikke tartty. Salynǵan aıyppuldyń jalpy somasy 299 mln teńgeni qurady. Kómir naryǵyndaǵy básekelestikti qorǵaý salasyndaǵy zańnamanyń saqtalýyn baqylaý jumysy jalǵasýda», - dedi Úkimet basshysy.
