Baqytjan Saǵyntaev Qoǵamdyq keńes jumysyn qorytyndylady
ALMATY. QazAqparat - Búgin Almaty ákimi Baqytjan Saǵyntaev Almaty qalasy Qoǵamdyq keńesiniń múshelerimen kezdesý ótkizip, 2021 jyldyń birlesken josparlaryn talqylady, dep habarlaıdy QazAqparat tilshisi.
Atap aıtqanda, olar - pandemııa jaǵdaıynda halyqqa kórsetiletin qoldaý sharalary, bilim berý jáne densaýlyq saqtaý júıelerin damytý, kólik ınfraqurylymy jáne energetıka salasyndaǵy jobalardy iske asyrý, qalanyń bas jospary men biryńǵaı dızaın-kodyn ázirleý jáne bekitý, qoǵamdyq quqyqtyq tártipti kúsheıtý týraly aıtty.
Almaty Qoǵamdyq keńesiniń tóraǵasy Rahman Alshanov sanıtarlyq-epıdemııalyq talaptarǵa oraı keńestiń jergilikti jerlerde qoǵamdyq monıtorıng júrgizgenin jáne onlaın-konferentsııa formatyna kóshkenin aıtty. Keńes otyrystynda COVID-19-ǵa qatysty jaǵdaı, medıtsınalyq mekemelerdiń jumysy, azyq-túlik baǵalaryna monıtorıng, áleýmettik mańyzy bar baǵyttar jáne qalalyq avtobýstardyń qyzmeti, karantın kezinde medıtsına qyzmetkerlerin qarjylyq qoldaý talqylandy.
Qoǵamdyq keńestiń múshesi, «Transparensı Qazaqstan» QQ qamqorshylyq keńesiniń tóraǵasy Marat Shıbutov sáýlet jáne qurylys máselelerine toqtaldy, sonymen birge ákimdik belgilegen merzimde JEO-yn gazdandyrý týraly sheshimdi qoldaıtynyn aıtty.
«Birinshiden, ákimdik pandemııa, lokdaýn kezinde qalanyń tynys- tirshiligin joǵary deńgeıde júrgizdi. Sonyń arqasynda halyq dúrbeleńge túsken joq. Ekinshiden, sońǵy onjyldyq boıy kóterilip kele jatqan JEO-yn gazdandyrý máselesi sheshildi. Úshinshide, qalanyń strategııalyq jospary qabyldandy», - dedi Qazaqstan Respýblıkasy Ulttyq kooperatıvter jáne ekonomıkalyq qoǵamdastyqtarynyń basqa da nysandary Qaýymdastyǵy» ZTB prezıdenti Qazbek Shaıh.
Kezdesý barysynda «Qazaqstannyń daǵdarys ortalyqtarynyń odaǵy» ZTB basqarma tóraıymy Z. Baısaqova, saıasattanýshy, qoǵam qaıratkeri A. Sarym, Almaty qalalyq alqa Tóralqasynyń múshesi, advokat N. Jazylbekov, Qazaqstannyń «KazRENA» ǵylymı-bilim berý kompıýterlik jelisin paıdalanýshylar qaýymdastyǵynyń bas dırektory B. Japarov sóıledi.
Kóterilgen máseleler boıynsha qalalyq basqarmalardyń basshylary, aýdan ákimderi tyńdaldy.
Baqytjan Saǵyntaev ákimdiktiń ashyq jumys jasaıtynyn atap ótti. Ol qala turǵyndaryn josparlanǵan sheshimder men ózgerister týraly habardar etý qajettigin basa kórsetti.
«Memleket Basshysy Qasym-Jomart Toqaev «Halyq únine qulaq asatyn memleket» tujyrymdamasyn aıqyndap berdi. Bizdiń basty mindetimiz- almatylyqtardyń barlyq suranystaryna jedel ári tıimdi jaýap berý. Qala turǵyndarynyń múddesi úshin is- qımyl jasaýǵa tıispiz. Qala turǵyndarynyń ómir súrý sapasy men deńgeıin arttyrý, jaıly ınfraqurylymdy qalyptasmtyrý úshin birigip jumys jasaýymyz qajet. Qala turǵyndaryn eń ózekti máselelerdi talqylaýǵa keńinen qatystyrǵan jón«-, dedi B. Saǵyntaev. Ákimniń osy bastamasy boıynsha budan bylaı Qoǵamdyq keńes múshelerimen kezdesýler aı saıyn ótetin bolady.
