Baqytjan Saǵyntaev: Qıyn jaǵdaıda aýyzbirshilik bolǵany jaqsy
ALMATY. QazAqparat – Almaty ákimi Baqytjan Saǵyntaev sel qaýpine baılanysty ún qosqan halyqqa alǵys aıtty, dep habarlaıdy QazAqparat tilshisi.
«Tańerteń QR ІІM habarlasyp, eger qıyn jaǵdaı bolatyn bolsa, halyqty kóshirý kerek degen oı boldy. 2015 jylǵydaı ózen arnasynan tasyp, tastar men laıly sý aǵatyn bolsa, tazalaý kerek bolady dep Uzynaǵashtan qosymsha áskerı kúshter shaqyrttyq. Sarbazdar, Ulttyq ulan sarbazdary kúrekterin ustap saqadaı saı tur. Halyq alańdap jazyp jatyr. Eriktiler alańdaýly. Qandaı kómek jasaıyq, ne isteıik dep jatyr. Osyndaı qıyn jaǵdaıda aýyzbirshilik bolǵany jaqsy. Almatylyqtar osy aýyzbirshiliktiń úlgisin kórsetip jatyr. Myń da bir rahmet bárine. Ázirge mamandar ózderi atqaryp jatyr», - dedi Baqytjan Saǵyntaev.
Qala ákimi halyqpen suhbattan eshqashan qashpaıtynyn jetkizdi.
«Men ár kezde ashyqpyn. Kezdesýden qashý, dıalogtan qashý degen joq. Usynystaryńyz bolsa aıtyp, áleýmettik jelide akkaýntqa jazyp otyryńyzdar. Onyń bári oqylyp jatyr. Júıe-júıege bólinip, tapsyrma berilip, qaralyp jatyr. Aıtylǵan sózdiń bári bos ketip jatyr dep oılamańyzdar. Qalanyń damýyna órkendeýine, aýdandardaǵy keıbir kemshilikterin kórmeı jatqan jerdi kóz jetkizip aıtyp otyrýǵa ol da jaqsy. Ákimderge ashyq alań ornatyp apta saıyn kezdesý tapsyrylǵan», - dedi ákim.
Aıta ketý kerek, búgin Almatyda Naýryzbaı aýdanynda az mólsherde sel júrgen bolatyn. TJD ókilderi halyqty qulaqtandyryp úlgerdi.
Qala ákimi Baqytjan Saǵyntaev oqıǵa ornyna shuǵyl attandy.
TJD Qarǵaly ózenindegi ahýal týraly baıandady. Mamandardyń aıtýynsha, alańdaýǵa esh negiz joq.
