Baqytjan Saǵyntaev QHR Memlekettik keńesi Premeriniń birinshi orynbasarymen kezdesti
ASTANA. QazAqparat - Búgin Úkimet úıinde QR Premer-Mınıstri Baqytjan Saǵyntaev Qytaı Halyq Respýblıkasynyń (QHR) Memlekettik keńesi Premeriniń birinshi orynbasary Chjan Gaolımen kezdesti, dep habarlaıdy primeminister.kz.
Kezdesý barysynda eki eldiń saýda-ekonomıkalyq, ǵylymı-tehnıkalyq, qarjy, energetıka, mádenı-gýmanıtarlyq salalardaǵy ózara is-qımyl máseleleri, birlesken iri jobalardy josparlaý men uzaqmerzimdi baǵdarlamalardy ázirleýdi qosa alǵanda, tranzıttik-kólik jáne ınfraqurylymdyq ózara is-áreket salalaryndaǵy máseleleri talqylandy.
Qazirgi tańda Qazaqstan men Qytaı arasynda qazaqstandyq «Nurly jol» ulttyq ekonomıkalyq baǵdarlamasy men qytaıdyń «Jibek jolynyń ekonomıkalyq beldeýi» bastamasyn túıindestirý boıynsha Yntymaqtastyq josparyn iske asyrý jumystary belsendi túrde júrgizilýde. Josparǵa QR Prezıdenti N. Nazarbaevtyń QHR Tóraǵasy Sı Tszınpınmen kelissóz júrgizýiniń qorytyndysy boıynsha 2016 jylǵy 2 qyrkúıekte Hanchjoýda qol qoıylǵan bolatyn.
Kezdesý barysynda aýyl sharýashylyǵy salasyndaǵy, qazaqstandyq sharýalardyń ónimderin qytaı naryqtaryna eksporttaýdy ilgeriletýdegi yntymaqtastyq keleshegine basa nazar aýdaryldy. Sonymen qatar sý qatynastary, transshekaralyq ózenderdi paıdalaný men qorǵaý máseleleri qaraldy.
QR men QHR arasyndaǵy 2016 jyldaǵy saýda aınalymy 7,9 mlrd dollardy, Qazaqstannan Qytaıǵa 2016 jyldaǵy eksport 4,2 mlrd dollardy, ımport - 3,7 mlrd dollardy qurady.
Qazaqstannan Qytaıǵa shyǵarylatyn eksporttyń zattaı kórinisi munaı men ýrandy esepke almaǵanda 20,4%-ǵa ósti.
Qytaı Qazaqstannyń basty ınvestıtsııalyq seriktesteriniń biri bolyp tabylady. 2005 jyldan bastap 2017 jylǵy 1 aqpanǵa deıingi aralyqta QHR-dan Qazaqstan Respýblıkasynyń ekonomıkasyna túsken tikeleı ınvestıtsııalar aǵyny 13,9 mlrd AQSh dollaryn quraǵan. Osy kezeńdegi Qazaqstannan Qytaıǵa jiberilgen ınvestıtsııalar kólemi 519,7 mln AQSh dollaryn quraǵan.
2017 jylǵy 1 aqpandaǵy jaǵdaı boıynsha Qazaqstanda qytaı kapıtaly qoldanylǵan 2783 kásiporyn tirkelgen.
QHR Astanada ótetin EKSPO-2017-ge qatysatynyn rastaǵan alǵashqy elderdiń biri jáne qytaı pavılony kórmedegi eń iri pavılondardyń biri bolady. Budan ózge, 2017 jyl «Qazaqstandaǵy Qytaı týrızminiń jyly» retinde málimdelgen, soǵan oraı elimiz Qytaıdan týrısterdiń úlken aǵynyn kútedi.
