Baqytjan Saǵyntaev qańǵyǵan oqtan kóz jumǵan kópbalaly ananyń otbasyna kóńil aıtty

ALMATY. QazAqparat- Almaty ákimi Baqytjan Saǵyntaev 5 qańtar kúni qaladaǵy tártipsizdik kezinde kenetten jaraqat alyp, qaza tapqan kópbalaly ananyń otbasymen kezdesti, dep habarlaıdy QazAqparat tilshisi.

Baqytjan Saǵyntaev qara jamylǵan otbasyna kóńil aıtyp bardy.

5 qańtar kúni keshke Janar Ótegenova qaladaǵy keleńsiz jaǵdaıǵa qaramastan kóshege shyǵýǵa májbúr bolǵan – onyń jańa týǵan sábıine shuǵyl túrde dári-dármek kerek edi.

Kólikte otyrǵanda basyna oq tıgen 35 jastaǵy áıel alǵan jaraqatynan kóz jumdy.

Onyń jubaıy Nursultan Búrkitbaev 2014, 2017, 2019 jáne 2021 jyly týǵan tórt balasymen jalǵyz qaldy.

Erli-zaıyptylar balalarymen birge jalǵa alynǵan ýaqytsha baspanada turatyn edi.

Qala ákimi Baqytjan Saǵyntaev Nursultan Búrkitbaevtyń turǵyn úı jaǵdaıyn jaqsartýǵa kómek kórsetý týraly ótinishin jeke baqylaýyna aldy.